Eignamat gömlu bankanna næsta marklaust

Samanburður á verðmati gömlu bankanna er óraunhæfur. Skilanefnd Kaupþings, sem var stærsti banki landsins fyrir hrunið í fyrra, miðar eignastöðuna við nóvember í fyrra. Hinir bankarnir setja verðmiða á eignir sínar þrjú til sjö ár fram í tímann.

Bernanke stappaði stáli í fjárfesta

Ben Bernanke, seðlabankastjóri í Bandaríkjunum sagði í fulltrúadeild Bandaríkjaþings nú í kvöld að kreppan gæti tekið enda á þessu ári og að eftirlitsaðilar væru ekki á þeim skónum að þjóðnýta bankana.

Ný lög myndu gera fjármagnsflutningara erfiðari

Erfiðara verður að svíkja undan skatti með því að flytja fjármagn til skattaparadísa ef nýtt frumvarp sem nú er í smíðum nær fram að ganga. Gera má ráð fyrir að íslenska ríkið verði af að minnsta kosti þremur milljörðum króna árlega vegna skattsvika af þessu tagi.

Gunnar verður formaður bankaráðs Nýja-Kaupþings

Gunnar Örn Kristjánsson kosinn formaður bankaráðs Nýja Kaupþings í stað Magnúsar Gunnarssonar á hluthafafundi bankans í gær.

AGS mætir á fimmtudaginn

Alþjóðagjaldeyrissjóðurinn hefur nú lýst því yfir formlega að von sé á sendinefnd frá sjóðnum hingað til lands á fimmtudaginn kemur. Sendinefndin verður hér á landi fram til 10 mars en fyrir henni fer Mark Flanagan.

Enn óljóst hvenær efnahagsreikningar bankanna líta dagsins ljós

Enn liggur ekki fyrir tímasetning á því hvenær efnahagsreikningar ríkisbankanna verða kynntir. Þetta kom fram í svari Gylfa Magnússonar viðskiptaráðherra við fyrirspurn Ólafar Nordal á Alþingi í dag. Gylfi sagði að gerð reikninganna hafi því miður tafist en hann sagðist vona að þeir yrðu gerðir opinberir sem fyrst.

Íslendingar vantrúaðir á hlutirnir fari að lagast

Væntingar íslenskra neytenda til efnahags- og atvinnuástandsins eru litlar um þessar mundir. Væntingavísitala Gallup mælist nú 24.3 stig samkvæmt könnun sem birt var í morgun en Greining Glitnis segir frá könnuninni í morgunkorni sínu. Vísitalan er álíka lág og hún hefur verið síðustu fjóra mánuði eða frá hruni bankanna.

Norskir bílasalar ánægðir með íslensku kreppuna

Norskir bílasalar eru himinlifandi með fall íslenska fjármálakerfisins þar sem það gefur þeim möguleika á að gera kostakaup í notuðum bílum. Í norska blaðinu Finansavisen í dag er viðtal við norska bílasalan Trond Sandven sem sérhæfir sig í innflutningi á notuðum lúxusbílum. Áður en allt fór til fjandans á Íslandi flutti hann flesta bíla sína inn frá Þýskalandi, um 50 til 60 stykki í hverjum mánuði.

Straumur fellur um ellefu prósent

Gengi hlutabréfa í Straumi hefur fallið um ellefu prósent í morgun. Þá hefur gengi bréfa í Bakkavör lækkað um 1,58 prósent, Færeyjabanka um eitt prósent og í stoðtækjafyrirtækinu Össuri um 0,64 prósent.

Sjötíu fyrirtæki gjaldþrota í janúar

Í janúar 2009 voru 70 fyrirtæki tekin til gjaldþrotaskipta samanborið við 41 fyrirtæki í janúar 2008, sem jafngildir tæplega 71% aukningu á milli ára. Þetta kemur fram á heimasíðu Hagstofunnar.

Stórlækkun bréfa í Asíu

Ekki var glæsilegt um að lítast á Asíumörkuðum í morgun, þar féllu hlutabréf í verði líkt og í Bandaríkjunum og hefur Asíuvísitala Morgan Stanley ekki staðið lægra síðan haustið 2003. Til dæmis féllu bréf stærsta olíuframleiðanda Kína um tæp fimm prósent og í Ástralíu féll tryggingarisinn Suncorp-Metway um sex prósent.

Hlutabréf snarféllu á Wall Street

Bandaríska hlutabréfavísitalan Dow Jones lækkaði um 3,4 prósent í gær og hefur ekki verið lægri í tæplega 12 ár. NASDAQ-vísitalan féll einnig og nam lækkun hennar 3,7 prósentum.

Fengu verkefni þrátt fyir að uppfylla ekki skilyrði

Tiboði HBH, verktakafyrirtækis í meirihlutaeigu Róberts Wessman, stærsta styrktaraðila Háskólans í Reykjavík, í verk við nýbyggingu skólans hefur verið tekið. Fyrirtækið uppfyllir ekki útboðsskilmála þar sem það er í vanskilum með lífeyrissjóðsiðgjöld.

Bréf Century Aluminum féll um 26 prósent í dag

Gengi hlutabréfa í Century Aluminum, móðurfélagi Norðuráls, féll um 26 prósent í fjórum viðskiptum upp á tæpar 40 þúsund krónur. Á sama tíma hækkaði gengi bréfa í færeyska olíuleitarfélaginu Atlantic Petroleum um 4,24 prósent.

MP Banki: 860 milljónir í hagnað

MP Banki hf. skilaði 860 milljóna króna hagnaði eftir skatta á árinu 2008, samanborið við 1.780 milljóna króna hagnað á árinu 2007. Í tilkynningu frá bankanum kemur fram að skýringa á minni hagnaði sé að leita í afskriftum í kjölfar falls stóru íslensku bankanna og gjaldþrots Lehman Brothers. Þetta kemur fram í ársreikningi bankans.

Baugur: Misskilningur í Telegraph

Fjármálastjóri Baugs segir að blaðamaður Telegraph misskilji hlutina þegar hún segir í grein í dag að endurskoðendur félagsins í Bretlandi hafi haft áhyggjur af Baugi strax árið 2007. Vísir greindi frá fréttinni í morgun.

Eignast líklegast Citigroup

Bandaríska ríkið mun að öllum líkindum eignast þjóðnýtta bandaríska fjármálafyrirtækið Citigroup. Fyrirtækið fékk um 3000 milljarða íslenskra króna í neyðaraðstoð á síðasta ári sem dugði ekki til og stendur það nú á brauðfótum.

Laun hækka en kaupmáttur hefur lækkað um 9,5 prósent

Launavísitala í janúar 2009 er 355,7 stig og hækkaði um 0,6 prósent frá fyrri mánuði. Þetta kemur fram á heimasíðu Hagstofunnar. Þar kemur einnig fram að launavísitalan hafi hækkað um 7,5 prósent síðastliðnga tólf mánuði.

Bréf Straums hækka um 8,9 prósent

Gengi hlutabréfa í Straumi hækkað um tæp 8,9 prósent í dag eftir lækkun í síðustu viku. Þá hefur gengi bréfa í Össuri hækkað um 0,43 prósent á annars rólegum degi í Kauphöllinni.

Baugur í vandræðum strax árið 2007

Endurskoðendur Baugs í Bretlandi höfðu verulegar áhyggjur af félaginu strax árið 2007 og sögðu í athugasemdum sínum við ársreikning fyrir það ár að óvissa væri uppi sem gæti vakið upp efasemdir um að Baugur gæti haldið áfram í rekstri. Þetta kemur fram í breska blaðinu The Telegraph.

Frestar endurskoðun á vaxtaálagi erlendra húsnæðislána

Íslandsbanki hefur ákveðið að fresta endurskoðun á vaxtaálagi erlendra húsnæðislána um eitt ár, fram til 1. mars 2010. Í tilkynningu frá Íslandsbanka segir að nú séu liðin fimm ár frá því að bankinn hóf að veita húsnæðislán í erlendri mynt. Í skilmálum vegna erlendra húsnæðislána er kveðið á um endurskoðun á vaxtaálagi lánanna eftir fimm ár, sem nú hefur verið frestað.

Hlutabréf hækkuðu í Asíu

Hlutabréf á mörkuðum í Asíu og Bandaríkjunum hækkuðu í verði í kjölfar væntinga um að bandaríska ríkið auki við hlut sinn í bankarisanum Citigroup sem það keypti 20 milljarða dollara hlut í á síðasta ári til að verja bankann falli.

Nikita hannar föt fyrir tölvuleik

Föt frá íslenska fatahönnunarfyrirtækið Nikita verður í tölvuleiknum Stoked, sem XBOX 360 mun gefa út núna á þriðjudaginn. Leikurinn hefur verið markaðssettur um víða veröld.

Ísland: Mesta kvikmyndaframleiðsluríki veraldar

Ísland er mesta kvikmyndaframleiðsluríki veraldar. Sé tekið mið af höfðatölu. Financial Times ritaði grein um þetta á vef sínum í gær.

Steve Cosser ræðir við Jón Ásgeir

Ástralski fjárfestirinn Steve Cosser var á fundi með Ara Edwald og Jóni Ásgeir Jóhannessyni í höfuðstöðum 365 í Skaftahlíð í dag. Með þeim var einnig forstjóri Stoða, Jón Sigurðsson.

Eignir BG Holding hugsanlega kyrrsettar

Bresk stjórnvöld gætu kyrrsett eignir BG holding, dótturfélag Baugs í Bretlandi, fái Landsbankinn eignarráð yfir þeim en bankinn er enn undir hryðjuverkalögum þar í landi. Komi þetta til mun eignum verða ráðstafað upp í skuldir bankans í Bretlandi segir formaður skilanefndar Landsbankans

Hópmálssókn gegn gömlu bönkunum

Lögmannastofa í Reykjavík undirbýr hópmálssókn á hendur gömlu bönkunum. Tugir einstaklinga hafa þegar lýst sig reiðubúna til að taka þátt í málssókn þar sem meðal annars verður sótt á grundvelli þess að eigendur bankanna hafi markvisst valdið viðskiptavinum sínum tjóni með því að fella krónuna.

Hörður fékk 95 milljónir í laun og bónusa á síðasta ári

Hörður Arnarson, forstjóri Marels, fékk 665 þúsund evrur eða um 95 milljónir króna í laun og bónusa á síðasta ári samkvæmt ársreikningi félagsins sem birtur var í gær.

Bankastjóri refsar sér fyrir mistökin

Stjórnarformaður bankans Bradford & Bingley í Bretlandi, Richard Pym, hefur ákveðið að borga sér ekki bónusa eins og tíðkast oft hjá stórfyrirtækjum. Þar með lækkar herra Pym launin sín um 750 þúsund pundum niður í 350 þúsund pund. Þá hefur hann einnig stytt uppsagnarfrestinn sinn úr tveimur árum niður í einn dag. Að eigin sögn; svo að hann verði ekki verðlaunaður fyrir að mistakast.

Marel tapaði 1,2 milljarði

Marel tapaði 1,2 milljarði á síðasta ári en félagið birti ársreikning sinn seint í gærkvöld. Það er nokkuð verri afkoma en árið 2007 þegar félagið skilaði 872 milljóna króna hagnaði.

Bandaríkjastjórn vill ekki þjóðnýta bankana

Stjórnvöld í Washington sendu skýr skilaboð í dag um að ekki stæði til að þjóðnýta tvo af stærstu bönkum Bandaríkjanna þrátt fyrir að hlutabréf í þeim hríðfélli. Sögusagnir á Wall Street um að bankarnir yrðu þjóðnýttir leiddi til þess að helstu hlutabréfavísitölur lækkuðu í dag. Þar óttast fjárfestar að

Gullverð hækkar í kreppunni

Gull virðist vera að hækka í verði þessa dagana ef marka má frétt breska blaðsins Telegraph af málinu. Verðið á einu únsi, tæpum 30 grömmum, fór upp fyrir 1000 bandaríkjadali, eða um 115 þúsund krónur, í viðskiptum í New York í dag. Þá fór verðið jafnframt hátt upp í 1000 dali í London en lækkaði svo nokkuð þegar leið á daginn.

Bandaríska gengishrunið sprengir netbólumúrinn

Helstu hlutabréfavísitölur í Bandaríkjunum eru lægri nú en þegar verst lét eftir netbóluna um síðustu aldamót og hryðjuverkaárásirnar á Tvíburaturnana 11. september 2001.

Nasdaq hækkaði í dag

Nasdaq vísitalan hækkaði í dag en Dow Jones og Standard & Poor´s lækkuðu. Reuters telur að breytingarnar séu viðbrögð við því að Hvíta húsið gaf út þá yfirlýsingu að ekki stæði til að þjóðnýta bankana. Dow Jones lækkaði um 0,7%. Standard & Poor´s lækkaði um 0,8% og Nasdaq Composite hækkaði um 0,21%.

Icelandair Group tapaði 7,5 milljörðum króna

Icelandair Group tapaði 7,5 milljörðum króna eftir skatta á síðasta ári, en hagnaður félagsins nam 0,3 milljörðum króna árið á undan.

Straumur féll um 19,3 prósent

Gengi hlutabréfa í Straumi féll um tæp 19,3 prósent á annars rauðum degi í Kauphöllinni í dag. Á hæla fjárfestingabankans kom Eimskip, sem féll um tíu prósent. Þá féll gengi bréfa í færeyska olíuleitarfélaginu Atlantic Petroleum um 5,56 prósent, í Bakkavör um 3,55 prósent og Færeyjabanka um 2,89 prósent. Þá lækkaði gengi bréfa Össurar um 1,16 prósent.

Tilboði Almenningshlutafélagsins hafnað

Tilboði Almenninshlutafélags í Árvakur, Útgáfufélags Morgunblaðsins var hafnað samkæmt heimildum fréttastofu. Þrjú skuldbindandi tilboð bárust fyrir tilboðsfrest sem rann út klukkan 14:00 í dag. Forsvarsmaður hópsins segir þetta koma sér mjög á óvart ef rétt reynist.

Stjórn Íslandsbanka kjörinn á hluthafafundi

Á hluthafafundi Glitnis nú Íslandsbanka fyrr í dag voru nýir stjórnarmenn kjörnir í stað þeirra sem létu nýverið af störfum.

Eigendur Tals eins og foreldrar í forræðisdeilu

Hilmar Ragnarsson og Þórhallur Guðlaugsson, sem sögðu sig úr stjórn Tals á dögunum vegna deilna í hlutahafahópi fyrirtækisins, segja deilurnar minna á illvígt forræðismál þar sem foreldrarnir berjist svo hatrammri baráttu að barnið gleymist.

Bjartsýnir á að tilboðinu verði vel tekið

Líkt og Vísir greindi frá fyrir stundu skilaði undirbúningshópur Almenningshlutafélags um Morgunblaðið tilboði í Árvakur hf. til Íslandsbanka en tilboðsfrestur rann út klukkan 14:00 í dag í tilkynningu frá hópnum segir að það sé mat hópsins að tilboðið sé fyllilega sanngjarnt fyrir hluthafa félagsins, kröfuhafa, starfsmenn og ekki síst lesendur Morgunblaðsins og mbl.is. Hópurinn er afar bjartsýnn á að tilboðinu verði vel tekið.

Sparisjóðinir lækka vexti inn- og útlána

Sparisjóðirnir munu flestir lækka inn- og útlánsvexti frá og með morgundeginum. Einng verður breyting á innlendum gjaldeyrisreikningum.

Þrjú tilboð bárust í Morgunblaðið

Þrjú tilboð bárust í Árvakur, Útgáfufélags Morgunblaðsins, en frestur til þess að skila inn tilboðum rann út klukkan 14:00 í dag. Óskar Magnússon fer fyrir einum af hópunum en hann skilaði inn tilboði á síðustu stundu. Hann segir tilboðið sanngjarnt og raunhæft.

Íslandsbanki enn á ný

Íslandsbanki er nýtt nafn Nýja Glitnis frá og með deginum í dag. Nafnabreytingin var formlega kynnt á fundi með fjölmiðlafólki í höfuðstöðvum Íslandsbanka við Kirkjusand í dag. Tilkynnt hafði verið um fyrirhugaða nafnabreytingu í desember á síðasta ári.

Frysting erlendra lána framlengd

Frysting erlendra myntkörfulána verður framlengd. Þetta var ákveðið á ríkisstjórnarfundi í morgun.

Líklegt að 72 milljarðar falli á Ísland vegna Icesave

Lárus Finnbogason formaður skilanefndar Landsbankans sagði á kynningarfundi með kröfuhöfum gamla Landsbankans að líklegt væri að 72 milljarðar króna falli á Ísland vegna Icesavereikninganna í Bretlandi. Það er umtalsvert minni upphæð en reiknað hafði verið með.