Eigendur Tals eins og foreldrar í forræðisdeilu

Hilmar Ragnarsson og Þórhallur Guðlaugsson, sem sögðu sig úr stjórn Tals á dögunum vegna deilna í hlutahafahópi fyrirtækisins, segja deilurnar minna á illvígt forræðismál þar sem foreldrarnir berjist svo hatrammri baráttu að barnið gleymist.

Þeir hafa nú sent bréf til Teymis, sem á meirihluta í Tali, þar sem gefnar eru ástæður fyrir úrsögn þeirra úr félaginu. Á dögunum var fjallað um úrsögn þeirra og sagt frá greinargerð sem þeir sendu frá sér á sama tíma þar sem þeir sögðust meðal annars aldrei hafa kynnst öðrum eins viðskiptasóðaskap og þeir urðu vitni að á þeim stutta tíma sem þeir sátu í stjórn félagsins.

Í nýja bréfinu segjast þeir félagar ekki hafa átt við Teymi sérstaklega eins og sumstaðar hafi verið látið liggja að. „Þetta er rangt og byggt á miskilningi," segja þeir. „Eins og fram kemur í bréfi okkar fengum við ýmsar skýrslur og gögn til að setja okkur inn í málið. Sumt er í eðli sínu trúanaðarmál en annað opinberar skýrslur. Þessar upplýsingar, ásamt samskiptum við eigendur og aðra aðila, urðu til þess að við kusum að nota umrætt hugtak til að lýsa upplifun okkar af þeirri reynslu." Þeir Þórhallur og Hilmar segja að í því liggi felist engin ásökun á Teymi, Capital Plaza, sem er hinn eigandi Tals, IP- fjarskipti, Vodafone, Samkeppniseftirlitið eða það starfsfólk sem þar vinnur.

„Við vorum einungis að lýsa upplifun okkar af málinu í heild. Það finnst okkur með miklum ólíkindum og minnir á illvígt forræðismál þar sem foreldrarnir berjast svo hatrammri baráttu að aðalatriðið, það er að segja barnið, gleymist." Þeir harma einnig að upphaflegt bréf þeirra hafi borist fjölmiðlum, enda hafi það eingöngu verið ætlað hlutaðeigandi aðilum og merkt sem trúnaðarmál. Þá taka þeir fram að bréfið hafi ekki verið greinargerð til Samkeppniseftirlitsins, eins og ítrekað hafi verið fullyrt í fjölmiðlum, heldur ætlað öðrum stjórnendum í Tali til útskýringar á afsögn úr stjórn félagsins.

Þórhallur og Hilmar eru þó ekki alls kostar ánægðir með framkomu Teymis eftir sem áður og segjast þeir hafa ýmislegt við hana að athuga. „Í bréfi frá Teymi til stjórnarformanns [Þórhalls, innsk.blm] eru settar fram mjög alvarlegar ásakanir, svo alvarlegar að Teymi sá ekki aðra leið en að lýsa yfir vantrausti og óskaði eftir því að Samkeppniseftirlitið skipaði annan fulltrúa í hans stað. Þá höfðum við setið í stjórn IP-fjarskipta í rúmlega einn virkan dag." Þeir segja augljóslega mjög alvarlegt þegar meirihlutaeigandi lýsir vantrausti á stjórnarformann og skyldu menn ætla að slíkt væri gert að vel athuguðu máli. Það hafi að þeirra mati ekki verið gert og benda þeir á að Teymi hafi ekki rætt umræddar ásakanir við þá.

„Þessi framkoma er fáheyrð og átti stóran þátt í úrsögn okkar úr stjórn fyrirtækisins," segja þeir að lokum í bréfinu til Teymis um leið og þeir óska IP-fjarskiptum alls hins besta í framtíðinni.

Þórdís J. Sigurðardóttir, stjórnarformaður Teymis, segist fagna bréfinu sem Hilmar og Þórhallur sendu Teymi til útskýringar á sínum sjónarmiðum í málinu. „Það er óþolandi að sitja undir ávirðingum eins og þeim sem fram komu þegar þeir sögðu sig úr stjórn Tals, en þeir eru menn að meiri fyrir að hafa dregið ásakanirnar til baka með þessum hætti. Að öllu óbreyttu er þessu máli lokið af okkar hálfu," segir Þórdís.