Ekki á döfinni að flytja Landhelgisgæsluna til Keflavíkur

Björn Bjarnason, dómsmálaráðherra, sagði við utandagskrárumræðu á Alþingi í dag að það væri ekki útilokað að flugstarfssemi Landhelgisgæslunnar verði flutt til Keflavíkur. Sagði hann þó að það væri ekki forgangsverkefni og að nú væri mikilvægasta verkefnið að huga að ytri umgjörð starfssemi Landhelgisgæslunnar.

Nýsköpunarverðlaun Samtaka ferðaþjónustunnar afhent í þriðja sinn

Nýsköpunarverðlaun Samtaka ferðaþjónustunnar voru afhent í þriðja skipti við athöfn á Hótel Holti í dag, miðvikudaginn 15. nóvember. Landnámssetur Íslands hlaut verðlaunin að þessu sinni fyrir vel útfærðar og vandaðar sýningar sem efla ímynd Íslands og eru til þess fallnar að efla ferðaþjónustu utan hins hefðbundna tímabils.

Verið að endurskoða reglur um flutning fanga

Lögreglan leitar enn Ívars Smára Guðmundssonar fanga af Litla Hrauni sem strauk í gær frá Héraðsdómi Reykjavíkur. Fangelsismálastjóri segir að ekki hafi verið talin ástæða til að hafa fangann í handjárnum. Reglur um flutning fanga eru nú í endurskoðun.

Rektor Bifrastar hlaut umbeðinn stuðning

Um sjötíu prósent viðstaddra nemenda og starfsfólks í Háskólanum á Bifröst lýsti í dag yfir stuðningi við Runólf Ágústsson, rektor skólans. Atkvæðagreiðslan fór fram á fundi, sem haldinn var rétt í þessu á háskólasvæðinu á Bifröst, vegna óánægju sem verið hefur verið innan skólans með störf rektors.

Um tvö hundruð hafa svarað kalli Blóðbankans

Um tvö hundruð manns hafa svarað kalli Blóðbankans og gefið blóð í dag en skortur hefur verið á blóði í bankanum. Sigríður Ósk Lárusdóttir, hjúkrunarfræðingur hjá Blóðbankanum, segir starfsfólk þakklát fyrir góð viðbrögð en enn vanti þó blóð.

Kosið um hvort rektor hafi stuðning

Nemendur og stjórnendur Háskólans á Bifröst funda nú vegna óánægju sem verið hefur með störf Runólfs Ágústssonar, rektors skólans. Að tillögu rektors er nú verið að greiða atkvæði um það hvort rektor njóti fulls stuðnings nemenda.

Dómsmálaráðherra neitaði að svara fyrirspurn á Alþingi

Björn Bjarnason, dómsmálaráðherra, var gagnrýndur á Alþingi í dag þegar hann neitaði að svara fyrirspurn Kristins H. Gunnarssonar, þingmanns Framsóknarflokksins. Kristinn vildi vita hversu oft símar Alþingismanna hafi verið hleraðir fyrir atbeina íslenskra stjórnvalda, hvenær það hafi gerst, hverjir hafi verið hleraðir og hver ástæðan var fyrir hleruninni.

Síminn breytir farsímagjöldum til Íslands

Síminn ætlar að breyta verði á símtölum til Íslands, úr farsímum, í næsta mánuði. Viðskiptavinir Símans greiða þá 137 króna tengigjald í upphafi en eftir það 11 krónur á mínútuna sem er innanlandstaxti.

Deilt á rektor á Bifröst

Boðað hefur verið til fundar nemenda og starfsfólks Háskólans á Bifröst nú klukkan þrjú og hefur kennsla verið felld niður í skólanum á meðan. Nokkur óánægja hefur verið innan skólans með störf Runólfs Ágústssonar rektor skólans.

Rætt um umferðaröryggi á Kjalarnesi

Vegargerðin mun á næstu vikum leggja fram tillögur um úrbætur til að auka umferðaröryggi á Vesturlandsvegi um Kjalarnes. Tillögurnar fela meðal annars í sér breikkun vegarins á köflum. Sturla Böðvarsson, samgönguráðherra, lýsti þessu yfir þegar rætt var um umferðaröryggi á Kjalarnesi í fyrirspurnartíma á Alþingi í dag.

Orðrómi eytt um Pólverja á Vellinum

Sá orðrómur að tugir pólskra verkamanna séu sestir að í íbúðablokkum þeim sem Varnarliðið átti á Keflavíkurflugvelli, er ekki á rökum reistur, segir Magnús Gunnarsson, formaður stjórnar Þróunarfélags Keflavíkurflugvallar. Orðrómur um þetta hefur verið á kreiki síðustu daga. Þetta kemur fram í Víkurfréttum í dag.

Alvarlegum slysum fjölgar

Alvarlegum slysum hér á landi hefur fjölgað um 43,6% á fyrstu níu mánuðum ársins. Alls hafa tuttugu og fimm látist í tuttugu og þremur banaslysum á árinu. Allt árið í fyrra létust nítján manns í umferðarslysum.

Hlíðarfjall opnað um helgina

Skíðasvæði Akureyringa í Hlíðarfjalli verður opnað á laugardaginn kemur. Flestar lyftur verða í gangi og skíðagöngusvæðið verður opið. Snjór á svæðinu er töluvert meiri en sést hefur á sama árstíma undanfarin ár. Snjókerfi, sem tekið var í notkun í fyrravetur gerir það einnig að verkum að hægt er að opna skíðasvæðið svo snemma.

Vinsælt að eiga sumarhús á Spáni

Hundruð ef ekki þúsundir Íslendinga eiga nú fasteignir á Spáni. Þeim hefur fjölgað verulega síðustu tvö árin. Á sama tíma fara æ fleiri í hefðbundnar pakkaferðir.

Mýrin með mestu aðsókn á Íslandi á þessu ári

Kvikmyndin Mýrin er orðin aðsóknarmesta mynd sem sýnd hefur verið í íslenskum kvikmyndahúsum á þessu ári. 65.670 manns hafa séð hana eftir aðeins 27 daga í sýningu í kvikmyndahúsum. Mýrin sló aðsóknarmet Pirates of the Caribbean 2 en 65.368 manns sáu myndina á árinu. Mýrin er einnig eina myndin sem hefur náð að tróna á toppi íslenska bíólistans fjórar vikur í röð

Kannað hvort kortaupplýsingar hafi verið nýttar

Lögregla rannsakar nú í samvinnu við kortafyrirtæki, hvort mennirnir tveir, sem voru handteknir í Reykjavík á laugardag fyrir að setja upp afritunarbúnað á hraðbanka, hafi nýtt sér upplýsingarnar, eða jafnvel komið þeim úr landi.

Stórfoss bætist í flota Eimskipa

Eimskip, dótturfélag Avion Group, hefur tekið við nýju frystiskipi í Noregi. Lára Konráðsdóttir gaf því nafnið Stórfoss, en með tilkomu þess bætir félagið siglingaáætlun sína frá Noregi til Bretlands, Belgíu og Hollands. Skipið er óvenju hraðskreitt, gengur á 16 mílum, og er þannig hannað að lestun og losun tekur talsvert skemmri tíma en venja er.

Vantar lengri flugbraut á Akureyri hið snarasta

Akureyrarbær og KEA hafa boðið flýtifjármögnun til að hægt sé að lengja brautina á Akureyrarflugvelli. Millilandaflug Iceland Express er í uppnámi vegna ófullnægjandi aðstöðu.

Rafmagn komið aftur á í Kjós

Rafmagn er aftur komið á Kjósina, en rafmagnstruflanir urðu á dreifikerfi sunnan Skarðsheiðar þegar unnið var að viðgerð og á allt að vera komið í lag aftur. Ekki er vitað annað en að allir notendur séu komnir með rafmagn á þessari stundu.

Humarsúpa Sægreifans í New York Times

Í sunnudagsblaði New York Times var fjallað afar vinsamlega um humarsúpu Sægreifans, sem Kjartan Halldórsson rekur við Reykjavíkurhöfn. Blaðið lýsti súpunni sem erkitýpískri og sagði hana hreina og beina, þjóðlega, algerlega svikalausa og það fyrsta sem menn skyldu fá sér þegar þeir kæmu í bæinn.

Bílaumboð eiga ekki að hvetja til utanvegaaksturs

Bílaumboð eiga að sjá sóma sinn í því að taka auglýsingar sínar, sem hvetja til utanvegaaksturs, úr umferð. Þetta segir framkvæmdastjóri Landverndar.

Sendiherra segir árás hafa verið mistök

Utanríkisráðherra afhenti í morgun sendiherranum bréf til utanríkisráðherra Ísraels, þar sem morðum á óbreyttum borgurum á Gaza í síðustu viku var harðlega mótmælt. Það sama gerði formaður Samfylkingarinnar á snubbóttum fundi með sendiherranum á Alþingi í dag.

Jólin kosta þjóðina átta milljarða króna

Jólin kosta þjóðina átta milljarða króna, fyrir utan virðisaukaskatt, ef spá Rannsóknarseturs verslunarinnar gengur eftir. Átta milljarðar samsvara því að hvert mannsbarn eyði um þrjátíu þúsund krónum, með virðisaukaskatti, í jólin á þessu ári.

Stjórnvöld verða að taka á málefnum innflytjenda segja Vinstri grænir og Samfylkingin

Farsæl aðlögun og barátta gegn fordómum hefst ekki án atbeina stjórnvalda en þetta kemur fram í framkvæmdaáætlun um málefni innflytenda sem borgarstjórnarflokkar Vinstri grænna og Samfylkingarinnar kynntu í dag.

Áætlun í málefnum innflytjenda

Farsæl aðlögun og barátta gegn fordómum hefst ekki án atbeina stjórnvalda, segir í framkvæmdaáætlun um málefni innflytenda sem borgarstjórnarflokkar vinstri grænna og Samfylkingarinnar kynntu í dag.

Stjórn Samtaka iðnaðarins sendir frá sér tilkynningu vegna kaupa Íslandspósts hf. á Samskiptum ehf.

Stjórn Samtaka iðnaðarins sendi í dag frá sér tilkynningu vegna kaupa Íslandspósts hf. á Samskiptum ehf. Segir í tilkynningunni að stjórnin ítreki þá stefnu sína að ríkið eigi að draga sig af markaði þar sem rekstur er allt eins vel eða betur kominn í höndum einkaaðila.

Krónan veikist

Gengi íslensku krónunnar veiktist um 2,3% í dag. Krónan hefur veikst um þrjú prósent á síðustu tveimur dögum og styrking síðustu sex vikna hefur því gengið til baka á aðeins þessum tveimur dögum. Í Hálf fimm fréttum greiningadeildar KB-banka segir að svo virðist sem að 4-5 mánaða nær samfelld styrking krónunnar sé nú rofin.

Ríkisstjórnin eflir íslenska kvikmyndagerð

Þorgerður Katrín Gunnarsdóttir menntamálaráðherra og Árni M. Mathiesen fjármálaráðherra undirrituðu í dag ásamt fulltrúum samtaka kvikmyndagerðarmanna samkomulag til næstu fjögurra ára um eflingu íslenskrar kvikmyndagerðar.

Hægt að banna ungum ökumönnum að aka á tilteknum tímum

Ríkisstjórnin samþykkti í morgun frumvarp til breytinga á umferðarlögum. Frumvarpið felur það í sér að hægt verður að gera ökutæki upptæk ef ökumaður gerist sekur um gróf og endurtekin brot á umferðarlögum. Í frumvarpinu er lagt til að settar verði reglur um stigskipt ökuskírteini. Heimilt verður þannig að banna yngri ökumönnum að aka á bifreið á tilteknum tíma sólarhrings, takmarka farþegafjölda þeirra og takmarka vélarafl ökutækjanna sem þeir stýra.

Lögreglan lýsir eftir strokufanga

Lögreglan í Reykjavík lýsir eftir Ívari Smára Guðmundssyni. Lögregla telur ástæðu til að ætla að Ívar Smári geti verið varasamur og er fólk hvatt til að vera á varðbergi. Ívar er refsifangi af Litla Hrauni og er að afplána 20 mánaða dóm vegna fíkniefnamála. Hann strauk frá fangaflutningsmönnum við Héraðsdóm Reykjavíkur um kl. 15:00 í dag. Hann var klæddur í svartan stuttermabol og  græna hettupeysu þegar hann hljóp frá fangaflutningsmönnum. Ívar er 26 ára gamall. Þeir sem geta gefið upplýsingar um ferðir Ívars eru vinsamlega beðnir um hafa samband við lögregluna í Reykjavík í síma 444-1000.

Gekk ítrekað í skrokk á barnsmóður sinni

Karlmaður á fertugsaldri var í dag dæmdur í Héraðsdómi Reykjavíkur í sjö mánaða fangelsi, þar af fimm mánuði skilorðsbundið, fyrir líkamsárásir á fyrrum sambýliskonu sína og barnsmóður. Maðurinn var jafnframt dæmdur fyrir húsbrot, brot á nálgunarbanni og fíkniefnalagabrot. Hann var sýknaður af vopnalagabroti.

Taka á upp svartlista Evrópusambandsins á flugrekstraraðilum

Innleiða á reglur um svartlista Evrópusambandsins á flugrekstraraðilum. Svartlistarnir fela í sér bann við flugi einstakra flugrekenda eða bann á öllu flugi frá einstökum ríkjum.

Lækjargata lokuð til norðurs vegna framkvæmda

Lækjargata verður lokuð til norðurs við Hverfisgötu næstu tíu dagana vegna framkvæmda. Lokað verður í fyrramáli klukkan tíu.

365 mótmæla frumvarpi um Ríkisútvarpið

Fjölmiðlafyrirtækið 365 mótmælir frumvarpi um Ríkisútvarpið sem lagt hefur verið fyrir Alþingi. 365 rekur meðal annars NFS. Í formlegri umsögn um frumvarp til laga um Ríkisútvarpið sem 365 hefur sent Alþingi segir meðal annars að með lögfestingu frumvarpsins telji 365 að enn frekar verði aukið á forskot RÚV á íslenskum markaði ljósvakamiðla og um leið vegið að starfsemi einkarekinna fjölmiðla. Að mati 365 er sú stefna í "hróplegu ósamræmi við þjóðfélagsstrauma í íslensku samfélagi og þau sjónarmið um jafnræði sem sífellt hafa fengið meira vægi, m.a. í löggjöf og samningum sem Ísland á aðild að."

Sendiherrar fara oft út bakdyramegin

Algengt er að sendiherrar erlendra ríkja fari bakdyramegin út úr utanríkisráðuneytinu, að sögn siðameistara þar.

Akureyrarbær styrkir Flugsafn Íslands

Akureyrarbær og Flugsafn Íslands hafa skrifað undir samning um framlag bæjarins til byggingar safnahúss undir starfsemi safnsins.

Þyrlur Gæslunnar að fara frá Höfn

Þyrlur Landhelgisgæslunnar, TF-Líf og nýja leiguþyrla Gæslunnar, eru nú að leggja af stað frá Höfn í Hornafirði. Þyrlurnar hafa verið þar í viðbragðsstöðu vegna erlends flutningaskips, sem lenti í háska rúmar hundrað sjómílur suðaustur af landinu, þegar aðalvél þess bilaði í nótt. Skipið siglir á ný fyrir eigin vélarafli áleiðis til Reyðarfjarðar þangað sem skipið er væntanlegt klukkan sex í kvöld.

Rætt um stóriðju á Suðurlandi

Iðnaðarráðherra var sakaður um tvískinnung á Alþingi í dag þegar hann segði enga stóriðjustefnu hér á landi heldur væri það á valdi sveitarfélaganna sjálfra að taka ákvörðun um orkufrekan iðnað. álversáform í Þorlákshöfn voru gagnrýnd í utandagskrárumræðu, sem Álfheiður Ingadóttir, VG. hóf.

Öxnadalsheiði fær á ný

Einn og hálfan tíma tók að rétta vörubílinn af

Búið er ná vörubíl aftur á hjólin eftir að hann valt við verslun í Lágmúla í dag. Vörubíllinn var að hífa gifsplötur við verslunina á tólfta tímanum í dag þegar ein af undirstöðum bílsins gaf sig og hann valt á hliðina. Hvorki bílstjóra né vegfarendur sakaði.

Heimdallur gagnrýnir fjölmiðlafrumvarpið

Heimdallur, félag ungra Sjálfstæðismanna í Reykjavík, hvetur þingmenn Sjálfstæðisflokksins til að falla frá hugmyndum um hámarkseignarhlutdeild, sem fram koma í svonefndu fjölmiðlafrumvarpi.

Litlu munaði að eldsprenging yrði á Laugavegi í gær

Aðeins munaði örfáum mínútum að eldur, sem kviknaði í risíbúð við Laugaveg í Reykjavík í gærkvöldi, ylli eldsprengingu og miklu eldhafi, sem hefði ógnað nærliggjandi húsum. Slökkviliðsmenn telja að hitinn í íbúðinni í gærkvöldi hafi verið orðinn 500 til 600 gráður.

Íslendingar bjóðast til að miðla málum

Valgerður Sverrisdóttir, utanríkisráðherra, sagði að loknum fundi með Miryam Shomrat, sendiherra Ísraels, í utanríkisráðuneytinu í morgun, að henni þættu skýringar Ísraela á árásum á óbreytta borgara Beit Hanoun á Gaza í síðustu viku ekki trúverðugar. Ísraelar segja að um tæknileg mistök hafi verið að ræða.

Rannsakað sem manndráp af gáleysi

Banaslysið á Reykjanesbraut á laugardagskvöld er rannsakað sem manndráp af gáleysi. Mennirnir tveir sem komust lífs af úr slysinu hafa verið úrskurðaðir í farbann til nóvemberloka og hafa réttarstöðu sakborninga.

Skipið á leið til Reyðarfjarðar

Erlent flutningaskip, sem lenti í háska í roki og stórsjó rúmar hundrað sjómílur suðaustur af landinu þegar aðalvél þess bilaði í nótt, siglir á ný fyrir eigin vélarafli áleiðis til Reyðarfjarðar. Hættan er talin liðin hjá.