Þrír Pólverjanna á leið til Reykjavíkur

Þrír af Pólverjunum átján, sem staðið hafa í deilum við starfsmannaleiguna 2B vegna vinnu þeirra við Kárahnjúka, eru á leið til Reykjavíkur og líklega á leið úr landi að sögn Odds Friðrikssonar, yfirtrúnaðarmanns á Kárahnjúkum.

Lögregla hætt að tjá sig um mál sexmenninga

Lögreglan í Glostrup í Danmörku er hætt að tjá sig um mál sexmenninganna sem handteknir voru í síðustu viku, grunaðir um að leggja á ráðin um hryðjuverkaárás í einhvers staðar í Evrópu. Eftir því sem fram kemur á vef Politiken er það vegna þess að einn af vinum hinna grunuðu hefur látlaust reynt að ná sambandi við þá.

Lítil svör um kaupin á Sterling

Vilhjálmur Bjarnason, hluthafi í FL Group, fékk lítil svör við spurningum sínum um kaupin á Sterling á hluthafafundi FL Group í dag. Hann ætlar að bera spurningarnar upp aftur og aftur þar til fullnægjandi svör hafa fengist.

500 föngum sleppt

Fimm hundruð föngum var í dag sleppt úr Abu Ghraib fangelsinu í Írak, í tilefni þess að föstumánuðinum Ramadan er að ljúka.

Stjórnvöld hafi ekki upplýsingar um fangaflug CIA

Íslensk stjórnvöld hafa ekki upplýsingar um flutninga Bandaríkjamanna á meintum hryðjuverkamönnum um íslenska lofthelgi.

Sljóleiki gagnvart ofurkjörum

Ingibjörg Sólrún Gísladóttir, formaður Samfylkingarinnar, telur að kaupréttarsamningar helstu stjórnenda Kaupþings banka orki tvímælis en þeir séu ekki einangrað tilvik, svona samningar séu mun útbreiddari en áður.

Nokkuð um umferðaróhöpp í Reykjavík í dag

Nokkuð hefur verið um umferðaróhöpp í Reykjavík í dag, bæði vegna hálku og þess að sól er lágt á lofti. Bíll valt á hliðina við Starengi í Grafarvogi laust eftir hádegi í dag eftir að ökumaður hans hafði misst stjórn á honum og bíllinn runnið á ljósastaur. Að sögn lögreglu voru slys á fólki minni háttar en bíllinn mun vera skemmdur.

Dauðsföllum vegna ofdrykkju fjölgaði um 20%

Dauðsföllum af völdum ofdrykkju fjölgaði um 20% í Finnlandi á síðasta ári. Engar tölur eru til um þessi mál hér á landi.

Hermaður grunaður um morð á yfirmönnum sínum

Rannsóknarmaður bandaríska hersins hefur lagt til að hermaður úr þjóðvarðliði Bandaríkjanna verði ákærður fyrir morð á tveimur yfirmönnum sínum í Írak í júní á þessu ári.

Sótti veikan sjómann

Björgunarþyrlan Líf sótti í morgun veikan sjómann út af Patreksfirði. Sjómaðurinn er í áhöfn á togaranum Guðmundi í Nesi og þótti nauðsynlegt að flytja hann sem fyrst á sjúkrahús eftir að ljóst var að hann var alvarlega veikur.

Stjórnendur KB banka högnuðust um 770 milljónir

Sjö æðstu stjórnendur Kaupþings banka högnuðust um samtals 770 milljónir króna í gær með því að nýta sér fimm ára gamlan kauprétt að hlutabréfum í bankanum á því gengi sem gilti fyrir fimm árum. Sigurður Einarsson stjórnarformaður keypti lang mest og hagnast á einum degi um röskar 400 milljónir króna.

Neyðarlínan synjaði konunni um aðstoð

Það gengur kraftaverki næst að kona skyldi sleppa lifandi þegar tengivagn flatti út bíl hennar í Leirársveit í gærkvöldi. Að sögn móður hennar hafði Neyðarlínan synjað henni um aðstoð áður en óhappið varð.

Ráðherra spurður um fangaflug í íslenskri lofthelgi

Formaður Vinstri grænna hefur lagt fram fyrirspurn til utanríkisráðherra um meint fangaflug CIA um íslenska lofthelgi. Svo virðist sem bandaríska leyniþjónustan CIA noti Keflavíkurflugvöll oft sem viðkomustað fyrir svonefndar draugaflugvélar sínar, sem sagt er að séu notaðar til að flytja grunaða hryðjuverkamenn til landa þar sem pyntingar eru leyfðar við yfirheyrslur.

Ótti við fuglaflensuna vestan hafs en ekki austan

Bandaríkjastjórn segir fuglaflensuna eina mestu ógn við líf og heilsu mannkynsins og vinnur nú að því að koma í veg fyrir faraldur í landinu. Heilbrigðisráðherrar Evrópusambandsins segja hættuna á faraldri hins vegar afar litla.

Tæplega 800 milljóna tap Haga

Tap Haga, dótturfélags Baugs Group, nam sjö hundrað og átta milljónum króna á fyrstu sex mánuðum ársins, sem er langt undir væntingum stjórnenda. Ástæðuna segja þeir vera harða samkeppni en Hagar reka meðal annars Bónus, Debenhams, Skeljung, Hagkaup, Topshop, Orkuna, 10-11, og Útilíf.

Lífstíll kærir ójafna samkeppnisstöðu

Líkamsræktarstöðin Lífstíll í Reykjanesbæ hefur kært ójafna samkeppnisstöðu einkarekinna líkamsræktarstöðva í bænum til Samkeppniseftirlitsins. Von er á niðurstöðu á næstu dögum.

Hrósaði Berlusconi fyrir stuðning við Bandaríkjamenn

George Bush, forseti Bandaríkjanna, hrósaði ítalska forsætisráðherranum, Silvio Berlusconi, fyrir dyggan stuðning við Bandaríkjastjórn í baráttunni við hryðjuverkamenn á blaðamannafundi í Hvíta húsinu í gær. Ekkert var rætt um áætlanir Ítala um að draga herlið sitt til baka en blaðamenn fengu ekki að spyrja spurninga.

SÞ fara ekki til Guantanamo

Sameinuðu þjóðirnar hafa afþakkað boð Bandaríkjamanna um að heimsækja Guantanamo-fangelsið á Kúbu. Þetta stafar af því að fulltrúar samtakanna áttu ekki að fá að ræða einslega við fangana meðan á heimsókninni stæði.

Pútín sækist ekki eftir endurkjöri

Vladimír Pútín Rússlandsforseti segist ekki ætla að bjóða sig fram til forseta aftur en kosningar fara fram í landinu árið 2008. Hann hét því hins vegar að hann muni sjá til þess að óstöðugleiki muni ekki ríkja í landinu í kjölfar kosninga.

D-listi fengi hreinan meirihluta

Sjálfstæðisflokkurinn fengi hreinan meirihluta, eða 57 prósent atkvæða, ef gengið yrði til borgarstjórnarkosninga nú, samkvæmt þjóðarpúlsi Gallups. Samfylkingin fengi fjórðung atkvæða, Vinstri grænir rúmlega 12 prósent, Framsóknarflokkurinn fjögur og Frjálslyndi flokkurinn rúmlega tvö prósent.

CIA virðist oft nota Keflavíkurflugvöll fyrir vélarnar

Svo virðist sem bandaríska leyniþjónustan CIA noti Keflavíkurflugvöll oft sem viðkomustað fyrir svonefndar draugaflugvélar sínar, sem sagt er að notaðar séu til að flytja grunaða hryðjuverkamenn til landa þar sem pyntingar eru leyfðar við yfirheyrslur.

Danskir háskólar þeir bestu á Norðurlöndunum

Danskir háskólar eru þeir bestu á Norðurlöndum þegar kemur að hugvísindum, félagsvísindum og náttúruvísindum. Þetta sýnir könnun hins virta breska menntatímarits The Times Higher Education Supplements, en tímaritið birtir árlega lista yfir 100 bestu háskóla heims.

Rækjuvefurinn skráður í Evrópusamkeppni

Rækjuvefur Grunnskólans á Hólmavík hefur verið skráður í Evrópusamkeppnina Elearning Awards, þar sem besta námsefnið á Netinu er verðlaunað. Rækjuvefurinn hlaut fyrr í haust fyrstu verðlaun í samkeppni um besta sjávarútvegsvefinn.

Krefst þátttöku Sýrlandsstjórnar í morðrannsókninni

Öryggisráð Sameinuðu þjóðanna hefur krafist fullrar þátttöku Sýrlandsstjórnar í rannsókninni á morði fyrrverandi forsætisráðherra Líbanons, Rafik Hariri. Í ályktun ráðsins um mál Sýrlands er þó ekkert minnst á refsiaðgerðir neiti Sýrlendingar að vera samvinnuþýðir.

Lítill fólksflutningabíll valt í Vatnsskarði

Lítill fólksflutningabíll með fimm farþegum um borð valt út af veginum í Vatnsskarði í gærkvöldi en engin meiddist. Björgunarsveitarmenn aðstoðuðu við að ná bílnum upp á veginn aftur og gat hann haldið för sinni áfram.

20 hið minnsta féllu í Basra

Að minnsta kosti 20 manns féllu og yfir 40 særðust þegar bílsprengja sprakk á vinsælli verslunargötu í Basra, næststærstu borg Íraks, í gærkvöld. Margt fólk var á götum úti til að fagna Ramadan-hátíðinni sem senn fer að ljúka.

Hornfirðingar byggja reiðhöll

Reiðhöll verður reist fyrir hestamannafélagið Hornfirðing á landi sem sveitarfélagið Hornafjörður hefur keypt af landbúnaðarráðuneytinu. Vonir standa til að landbúnaðarráðherra styrki framkvæmdina um allt að krónu á móti krónu heimamanna.

Jónatan hættur við að hætta

Jónatan Garðarsson sjónvarpsmaður er hættur við að hætta í Kastljósi Ríkissjónvarpsins. Hann hafði lýst því yfir í október að hann væri óánægður með hlut menningarefnis í Kastljósinu og að hann myndi hætta nú um mánaðamótin ef ekki yrði úr því bætt.