Hyggst koma á gæðavottun á jöfn laun

Árni Magnússon félagsmálaráðherra hyggst koma á gæðavottun um jöfn laun í því skyni að hvetja atvinnurekendur til að útrýma launamun kynjanna. Hann segist ekki vita til þess að þessari aðferð sé beitt í nokkru öðru landi en telur að hún geti á jákvæðan hátt stuðlað að því að atvinnurekendur sjái sér beinan hag í því að hafa jafnréttissjónarmið að leiðarljósi í rekstri fyrirtækja sinna.

Strætókort til vinnu og skóla

Gjaldskrárhópur Strætó bs. vinnur að útfærslu vinnustaðakorta, sem fyrirtæki geta keypt fyrir þá starfsmenn sína sem nota þennan samgöngumáta, að sögn Ásgeirs Eiríkssonar framkvæmdastjóra. Þegar hafa verið gefin út skólakort sem gilda í níu og hálfan mánuð. Þau eru handhafakort, sem kosta 25.000 krónur.

Árlegt fjársvelti

Sveitarstjórn Þingeyjarsveitar hefur sent Valgerði Sverrisdóttur, ráðherra byggðamála, Þorgerði Katrínu Gunnarsdóttur menntamálaráðherra, þingmönnum Norðausturkjördæmis og fjárlaganefnd Alþingis áskorun þess efnis að Þekkingarsetri Þingeyinga á Húsavík verði tryggt nægilegt rekstrarfé.

Kvaðst vera vitorðsmaður

Breska lögreglan handtók um helgina mann sem viðurkenndi í blaðaviðtali að hafa verið í vitorði með mönnunum sem myrtu 52 í sprengjuárásum í Lundúnum 7. júlí. Sunnudagsblaðið News of the World greindi frá því í gær að lögregla í Dewsbury í Vestur-Jórvíkurskíri hefði í fyrradag handtekið Imran Patel eftir ábendingu frá ritstjórn blaðsins, en Patel hafði viðurkennt í samtali við blaðamann að hafa átt að taka þátt í hryðjuverkaárásunum.

Nýr samningur við Fang ehf.

Verkalýðsfélag Akraness skrifar í dag undir nýjan fyrirtækjasamning við eigendur Fangs ehf. að því er segir á heimasíðu félagsins. Formaður þess kynnti samninginn fyrir starfsmönnum í síðustu viku og ríkti almenn sátt um hann.

Þrír dóu þegar brúin hrundi

Steypiregn olli því að brú hrundi í Puglia-héraði á sunnanverðri Ítalíu í gær með þeim afleiðingum að þriggja manna fjölskylda sem var í þann mund að aka yfir brúna beið bana.

Kaczynski var kjörinn forseti

Pólverjar kusu í gær Lech Kazcynski forseta sinn ef marka má útgönguspár. Donald Tusk, keppinautur hans, lýsti sig sigraðan fljótlega eftir að spárnar voru birtar.

Al-Kaída hvetur til mannúðar

Arabíska sjónvarpsstöðin al-Jaazera birti í gær ávarp Ayman al-Zawahiri, næstráðanda al-Kaída samtakanna, þar sem hann hvatti múslima til að aðstoða fórnarlömb jarðskjálftans í Pakistan. Pakistönsk stjórnvöld hafa aðstoðað Bandaríkjamenn í stríðinu gegn hryðjuverkum og því vekur yfirlýsingin athygli.

Að minnsta kosti tuttugu látnir

Að minnsta kosti tuttugu manns létu lífið og fjölmargir særðust í Bagdad í dag þegar þrjár bílsprengjur voru sprengdar við hótel sem erlendir fréttamenn dveljast einkum á.

Reykingabann í Bretlandi?

Ráðherrar bresku ríkisstjórnarinnar sitja nú á fundi, þar sem tekin verður ákvörðun um hvort banna eigi reykingar á öllum opinberum stöðum á Bretlandi.

15 fjölskyldur fá ferða­styrk

Á laugardag var 15 styrkjum úthlutað úr sjóðnum Vildarbörn Icelandair. Styrkinn fá langveik börn og fjölskyldur þeirra til að gefa þeim tækifæri til að fara í draumaferðina.­­

117 taldir af eftir flugslys

Nígería Boeing-þota í eigu nígerísks flugfélags fórst í fyrrakvöld með 117 manns skömmu eftir flugtak frá borginni Lagos. Afar misvísandi fréttir bárust af slysinu framan af gærdeginum. Þotan, sem var af tegundinni Boeing 737 og var í eigu nígeríska flugfélagsins Bellview Airlines, var á leið frá Lagos, stærstu borg landsins, til höfuðborgarinnar Abuja.

Að minnsta kosti sjö látnir

Minnst sjö manns létu lífið þegar fellibylurinn Wilma gekk yfir Júkatan-skaga í Mexíkó um helgina. Bylurinn stefnir nú í átt að suðurhluta Flórída. Enn ein hitabeltislægðin hefur myndast í Karíbahafi.

Vonast eftir fleirum á útifund en fyrir 30 árum

Vonir standa til að jafnmargir, og helst fleiri, mæti á útifundinn á kvennafrídaginn á morgun en fyrir þrjátíu árum. Erlendir fjölmiðlar sýna baráttunni hér á landi áhuga.

Yfirdýralæknir býst ekki við hinu versta fyrr en næsta vor

Fuglaflensan sem fannst í fjórum öndum í Svíþjóð í gær er ekki af þeim stofni veirunnar sem borist getur í menn. Yfirdýralæknir segir nauðsynlegt að búast við hinu versta - en þó ekki fyrr en næsta vor.

Margir meðal aldraðra einangraðir

Eldri borgarar eru líka hópur sem verkefnið Þjóð gegn þunglyndi mun ná til en í nágrannalöndunum hefur sjálfsvígum fjölgað þeirra á meðal. Kannanir hafa sýnt að margir eru félagslega einangraðir og mikil þörf er á heimsóknarþjónustu sem nú er áhersluverkefni Rauða krossins.

Verkstjóra sagt að berja þá

Verkstjóra yfir pólskum verkamönnum á Kárahnjúkasvæðinu var sagt að berja þá sýndu þeir mótþróa við vinnu. Þetta segir Oddur Friðriksson trúnaðarmaður starfsmanna á staðnum. Forsvarsmaður starfsmannaleigunnar TÚ-BÍ segir verkalýðshreyfinguna leggja sig í einelti.

Barátta gegn sjálfsvígum ber árangur

Ungir samkynheigðir, atvinnulausir og unglingar sem falla úr námi eru líklegri til að svipta sig lífi en aðrir. Sjálfsvígum hefur fækkað eftir að hópur á vegum landlæknisembættisins hóf vinnu gegn sjálfsvígum fyrir þremur árum.

Heilbrigðisyfirvöld róleg

Íslensk stjórnvöld halda ró sinni þó að fuglaflensan hafi greinst í fuglum í Svíþjóð enda var þar ekki um að ræða hættulegu flensuna af H5N1 stofni sem getur smitast í menn.

Ein milljón varð fyrir tjóni

Að minnsta kosti ein milljón manna hefur orðið fyrir tjóni þegar fellibylurinn Wilma gekk yfir Mexíkó um helgina. Minnst sex hafa látist í óveðrinu. Alvarlegust er eyðileggingin á ferðamannasvæðinu Cancún en þar eru sjö hundruð þúsund manns talin hafa misst heimili sín. Talið er að þrjú hundruð þúsund manns til viðbótar hafi orðið fyrir einhverjum skaða.

Bannað að tala við íslendinga

Pólskum verkamönnum á Kárahnjúkasvæðinu var bannað að hafa samband við íslenska samstarfsmenn sína. Þetta segir Oddur Friðriksson, trúnaðarmaður starfsmanna. Hann segir fulltrúa starfsmannaleigunnar 2 B, sem flytur inn pólska verkamenn til vinnu við Kárahnjúka og víðar, hafa sagt verkstjóra Suðurverks að berja Pólverjana sýndu þeir mótþróa í vinnu.

Öndin ekki smituð af H5N1

Öndin sem drapst af fuglaflensu í Svíþjóð í vikunni var ekki smituð af H5N1 afbrigði flensunnar sem borist getur í menn. Alls hefur 61 maður látist vegna veirunnar í Asíu en fuglaflensan hefur nú greinst í fimm Evrópulöndum. Rússlandi, Tyrklandi, Rúmeníu, Króatíu og nú síðast í Svíþjóð. Öndin drapst í Eskiltuna, um 100 kílómetra vestur af Stokkhólmi og var hún smituð af mildara afbrigði veirunnar, samkvæmt niðurstöðum dýralækna.

Maður handtekinn í Lundúnum

Breska lögreglan hefur handtekið mann sem sagður er hafa verið beðinn um að ganga til liðs við mennina sem sprengdu upp neðanjarðarlestir og strætisvagn í Lundúnum í júlí síðastliðinum.

Enginn komst lífs af

Nú er ljóst að enginn komst lífs af eftir að nígerísk farþegaþota fórst skömmu eftir flugtak frá borginni Lagos í morgun. Alls voru 116 manns um borð. Flak vélarinnar fannst í héraðinu Kishi Oyo. Vélin, sem var af gerðinni Boeing 737, var í eigu flugfélagsins Bellview Airlines og var á leiðinni til Ajuba, höfuðborgar Nígeríu.

Fuglaflensa í Svíþjóð

Fuglaflensan er komin upp í Svíþjóð. Veiran fannst í fjórum öndum sem fundust dauðar í Eskilstuna í gær, um 100 km vestur af Stokkhólmi. Ekki er hins vegar ljóst hvort veiran sem olli flensunni er af H5N1 stofni, sem getur borist í menn. Talsmaður yfirdýralæknisembættis Svíþjóðar, segir ljóst að ein öndin hafi verið með fuglaflensu en greining á stofni veirunnar liggur fyrir innan nokkrra daga.

Fimm farast í Indlandi

Að minnsta kosti fimm létust og sex slösuðust þegar íbúðahús hrundi í borginni Bombay á Indlandi í morgun. Verið var að vinna við að styrkja húsið þegar þegar það hrundi og lentu verkamenn undir rústunum. Fjölmargar byggingar hafa hrunið í borginni frá því í ágúst þegar miklar rigningar gengu yfir hana.

Þrír látnir á Ítalíu

Þrír létust er brú hrundi í Puglia á Ítalíu í nótt. Þá slösuðust að minnsta kosti þrír þegar lest fór út af sporinu í Puglia í dag. Talið er að miklar rigningar hafi valdið óhappinu en alls voru um 60 manns í lestinni sem var á leið frá Taranto í Puglia til Mílanó. Lestin hafði verið á ferð í klukkustund þegar óhappið varð. Unnið er að björgunaraðgerðum.

Dregur úr kamfílóbaktersýkingum

Tekist hefur að draga verulega úr kamfílóbaktersýkingum í kjúklingum hér á landi, samkvæmt upplýsingum frá embætti yfirdýralæknis. Í september í fyrra var hlutfall kamfílóbatkeríusýktra kjúklinga yfir fjörtíu og eitt prósent, en í síðasta mánuði var það komið niður í sjö komma þrjú prósent.

Maður drepinn í Englandi

Einn maður var stunginn til bana þegar átök brutust út milli ungmenna í borginni Birmingham á Englandi í gærkvöldi.

Sex farast í Cancun

Mikil eyðilegging blasir við í Cancun í Mexíkó þar sem fellibylurinn Wilma gekk yfir um helgina. Minnst sex fórust í óveðrinu.

Fjórir látið lífið

Mikið óveður geysar í grennd við borgina Barí í suðausturhluta Ítalíu og hafa minnst fjórir látið lífið þar undanfarinn sólarhring. Miklar rigningar eru á svæðinu og hafa vegir farið í sundur og brýr eyðilagst. Fimmtán manns slösuðust í morgun þegar lest á leið frá Puglia til Mílanó fór út af sporinu eftir að aurskriða féll á lestarteinana.

66 látnir í Nígeríu

Flak nígerísku farþegaþotunnar sem fórst skömmu eftir flugtak frá borginni Lagos í Nígeríu í morgun, er fundið. Alls létust sextíu og sex manns í slysinu en eitt hundrað og sextán manns voru um borð.

Þréttán falla í Írak

Að minnsta kosti þrettán féllu og yfir þrjátíu særðust í árásum uppreisnarmanna í Írak í morgun. Lögreglumaður og fjögur börn hans voru meðal hinna sem féllu en eldur kom upp í bifreið þeirra í kjölfar sprengingar í norðurhluta landsins. Enginn samtök hafa lýst yfir ábyrgð á verknaðinum.

Flugvélin fundin

Flak nígerísku farþegaþotunnar sem fórst skömmu eftir flugtak frá borginni Lagos í morgun, er fundið. Flakið fannst í héraðinu Kishi Oyo. 116 manns voru um borð í þotunni og ekki er ljóst hvort nokkur hafi komist lífs af. Vélin var á leiðinni til Ajuba, höfuðborgar Nígeríu en meðal annarra voru um borð hátt settir embættismenn stjórnvalda. Flugslys hafa verið tíð að undanförnu en þetta er sjötta farþegavélin sem ferst á þremur mánuðum í heiminum. Björgunarstarf stendur nú yfir.

Flugvél ferst

Talið er að nígerísk farþegavél, með 114 manns innanborðs, hafi brotlent í sjó í nótt samkvæmt fréttavef CNN. Það hefur þó ekki fengist staðfest. Vélin hvarf skömmu eftir flugtak í Lagos en þjóðerni farþeganna er ekki vitað. Vélin var á leið til Abuja, höfuðborgar landsins.

Wilma að Flórídaskaga

Fellibylurinn Wilma hefur orðið að minnsta kosti tveimur að bana í Mexíkó. Víða hafa hús í strandbæjunum Cancun og Playa del Carmen eyðilagst og tré rifnað upp með rótum. Wilma telst nú vera þriðja stigs fellibylur en var fjórða stigs fyrri partinn í gær. Þúsundir þeirra ferðamanna, sem ekki náðu að koma sér í burtu áður en fellibylurinn skall á, hafast nú við í neyðarskýlum og bíða þess að óveðrið lægi. Hugsanlegt er talið að það verði ekki fyrr en seinni partinn í dag. Þá er búist við að Wilma komi að Flórídaskaga og til Kúbu og hefur neyðarástandi verið lýst yfir á báðum stöðum.

Reykingabann um mitt ár 2007

Bann við reykingum á veitingahúsum tekur gildi hér á landi um mitt árið 2007samkvæmt frumvarpi heilbrigðisráðherra sem ríkisstjórnin hefur samþykkt. Engar undantekningar verða á reglunni. Margir veitingahúsaeigendur eru afar ósáttir við ákvörðun ríkisstjórnar en Írar og Norðmenn voru fyrstir til að leggja blátt bann við reykingum á veitingahúsum.

Waterloo besta lagið

Lagið Waterloo, sem hljómsveitin Abba flutti í Söngvakeppni evrópskra sjónvarpsstöðva árið 1974, var í gærkvöld valið Eurovision-lag allra tíma á hátíð, sem haldin var í Kaupmannahöfn en Eurovision hefur nú verið haldið 50 sinnum. Valið stóð á milli 14 laga, sem áður voru valin í netkosningu. Í öðru sæti varð Volare, sem ítalinn Domenico Modugno söng árið 1958 og í þriðja sæti varð Hold me now sem Johnny Logan söng árið 1987.

Árásirnar réttlætanlegar

Um helmingur Íraka telur að árásir á bandaríska og breska hermenn séu réttlætanlegar. Þetta kemur fram í skoðanakönnun sem breska varnarmálaráðuneytið lét gera í ágúst síðastliðnum. Þá eru rúm 80 prósent Íraka mjög andvígir veru hernámsliðsins í Írak og segjast tveir af hverjum þremur óöruggari með sig vegna veru hernámsliðsins í landinu. Aðeins eitt prósent Íraka telur að landið sé nú öruggara en fyrir stríð.

117 manns létust

Enginn komst lífs af þegar farþegaþota með hundrað og sautján manns innanborðs fórst skömmu eftir flugtak í Lagos í Nígeríu í morgun. Vélin var á leiðinni til Abuja, höfuðborgar landsins.

Einn stunginn til bana

Einn maður var stunginn til bana í óeirðum sem blossuðu upp á milli afrískra og asískra ungmenna í Birmingham á Englandi í gærkvöldi. Lögreglumaður, sem reyndi að stilla til friðar, særðist alvarlega þegar skotið var á hann.

Kaupverðið 15 milljarðar

FL Group kaupir danska flugfélagið Sterling á 15 milljarða króna. Á næstunni verður farið í hlutabréfaútboð í FL Group upp á 44 milljarða króna. Hannes Smárason, forstjóri FL Group, tilkynnti þetta á fundi með fréttamönnum sem enn stendur yfir.

Neyðarástand á Yukatanskaga

Fellibylurinn Wilma fer nú yfir Yukatanskaga í Mexíkó og flæðir gríðarlegur sjór yfir baðstrandarbæinn Cancun. Allt að átta metra djúpt vatn er á sumum svæðum.

Tíminn að renna út

Gríðarlegir kuldar á skjálftasvæðunum í Pakistan gera hjálparstarfi erfitt fyrir. Útlit er fyrir að einungis helmingur þeirra, sem misstu heimili sín í hamförunum, fái tjald til að gista í.

Nýr varnarmálaráðherra í Serbíu

Næsti varnarmálaráðherra Serbíu og Svartfjallalands verður Zoran Stankovic, fyrrverandi hershöfðingi. Fjölmiðlar í Serbíu vekja á því athygli í dag að Stankovic hafi á sínum tíma verið í tengslum við Ratko Mladic, fyrrverandi yfirmann herafla Bosníu-Serba, sem er í felum vegna fjölmargra stríðsglæpa á síðasta áratug. Þeirri spurningu er varpað upp, hvort hinn nýi varnarmálaráðherra fái það hlutverk að semja við stríðsglæpadómstólinn í Haag um framsal Mladic. Hann segist þó hvorki hafa séð Mladic né heyrt í honum síðastliðin sex ár og hafi ekki hugmynd um hvar hann felur sig.