Trump vill fleiri bensín­háka á göturnar

Með breytingunum á kröfum um sparneytni er áætlað að meðaleldsneytiseyðsla fólksbíla og jeppa verði um 6,8 lítrar á hundrað kílómetra (34,5 mílur á gallon) árið 2031. Reglurnar sem settar voru í forsetatíð Joe Biden áttu að leiða til þess að meðaleyðsla væri um 4,7 lítrar á hundraðið (50,4 mílur á gallon).

Rökin sem Donald Trump forseti færði fyrir afnámi fyrri reglna voru að það drægi úr „sóun“ í bílaframleiðslu í Bandaríkjunum, gerði nýja bíla ódýrari og það yki innlenda bílaframleiðslu. Ákvörðunin um útvötnun reglnanna verður kynnt í dag.

Bandarísk samgönguyfirvöld áætluðu að eldri reglurnar kæmu í veg fyrir bruna á um 53 milljörðum lítra af bensíni fyrir miðja öldina. AP-fréttastofan segir að án reglnanna megi gera ráð fyrir að árið 2035 muni bandarískir bílar losa rúmlega 22 þúsundum tonnum meira af gróðurhúsalofttegundinni koltvísýringi á hverju ári, níutíu tonn af sóti og hátt í fimm þúsund tonn af öðrum mengandi efnum.

Stjórn Biden sagði á sínum tíma að þó að sparneytnari bílar væru dýrari en aðrir kæmu þeir betur út fyrir neytendur vegna sparnaðar á bensíndælunni.

Bensínverð er í hæstu hæðum í Bandaríkjunum og annars staðar vegna hernaðaraðgerða Trump-stjórnarinnar gegn Íran. Þær hafa leitt til meiriháttar raskana á flutningi á olíu frá Miðausturlöndum frá því að stríðsreksturinn hófst í lok febrúar.