Innlent

Dulin hækkun rök­studd með styttingu vinnu­vikunnar

Birgir Olgeirsson skrifar
Frá vinstri eru Inga Sæland, Kristrún Frostadóttir forsætisráðherra, Daði Már Kristófersson fjármálaráðherra og Þorgerður Katrín Gunnarsdóttir við kynningu fjárlagafrumvarpsins. Persónuafsláttur og skattþrep eiga að hækka minna en núgildandi regla segir til um og skila ríkinu 3,1 milljarði króna í auknar tekjur. Styttri vinnuvika er meðal þess sem stjórnvöld vísa til þegar breytingin er rökstudd.
Frá vinstri eru Inga Sæland, Kristrún Frostadóttir forsætisráðherra, Daði Már Kristófersson fjármálaráðherra og Þorgerður Katrín Gunnarsdóttir við kynningu fjárlagafrumvarpsins. Persónuafsláttur og skattþrep eiga að hækka minna en núgildandi regla segir til um og skila ríkinu 3,1 milljarði króna í auknar tekjur. Styttri vinnuvika er meðal þess sem stjórnvöld vísa til þegar breytingin er rökstudd. Anton Brink

Ríkissjóður fær 3,1 milljarði króna meira í tekjuskatt árið 2027 en ef núverandi regla héldi sér. 

Í fjárlagafrumvarpinu er þetta orðað þannig að „framleiðniviðmiðið“ verði núll prósent árið 2027.

Á bak við þetta tæknilega orðalag er eftirfarandi breyting. Persónuafslátturinn og mörk skattþrepanna hækka minna en núgildandi lög gera ráð fyrir. Því verður meira tekið af launum fólks í skatt.

Meira af laununum fer í hærra þrep

Í dag greiðast 31,49 prósent í skatt af fyrstu 498.122 krónum mánaðarlauna. Af launum umfram þá upphæð greiðast 37,99 prósent og af tekjum yfir 1.398.450 krónum greiðast 46,29 prósent.

Aðeins sá hluti launanna sem fer yfir mörkin ber hærri skatt. Ef mörkin hækka minna færist stærri hluti launanna upp í hærra þrep.

Persónuafslátturinn lækkar síðan skattreikninginn. Hann er nú 72.492 krónur á mánuði. Þar sem hann hækkar minna árið 2027 verður afslátturinn lægri en hann hefði annars orðið.

Skattprósenturnar breytast því ekki. Fólk greiðir samt meiri skatt.

Segja fyrri hækkanir hafa verið of miklar

Mörk skattþrepanna og persónuafslátturinn hækka venjulega í takt við verðbólgu. Við þá hækkun hefur einnig verið bætt einu prósenti vegna áætlaðrar framleiðniaukningar.

Ríkisstjórnin ætlar að sleppa þessu eina prósenti árið 2027. Fjárhæðirnar hækka því aðeins um áætlaða verðbólgu, eða 5,2 prósent.

Ráðuneytið segir framleiðniaukninguna hafa verið minni en áður var talið, meðal annars vegna styttri vinnuviku. Persónuafslátturinn og skattþrepin hafi því hækkað of mikið undanfarin ár og skattbyrði lækkað án þess að það hafi verið ætlunin.

Stjórnvöld líta því á breytinguna sem leiðréttingu. Fyrir skattgreiðendur þýðir hún að 3,1 milljarði króna meira verður tekið af þeim í skatt árið 2027.

Ríkisstjórn Kristrúnar Frostadóttur Fjárlagafrumvarp 2027 Alþingi Stytting vinnuvikunnar Rekstur hins opinbera Vinnumarkaður

Tengdar fréttir

Reiðarslag, gríðarleg vonbrigði og „efnahagslegt flanerí“

Framkvæmdastjóri Samtaka í ferðaþjónustu segir fjárlagafrumvarp fyrir næsta ár fela í sér reiðarslag fyrir ferðaþjónustu á Íslandi en stór hluti tekjuaukningar ríkisins kemur frá ferðaþjónustunni. Aukin skattheimta séu gríðarleg vonbrigði og „efnahagslegt flanerí,“ sem nemi helmingi heildarafkomu greinarinnar árið 2024.

„Hvar ætla þau þá að spara?“

Þingmenn stjórnarandstöðunnar segja jákvætt að ríkisstjórnin stefni að hallalausum ríkisrekstri en segja að það hangi á bláþræði hvort það muni takast og óttast að áætlanir muni ekki halda. Þá segist þingmaður Miðflokksins óljóst hvar skera eigi niður á meðan þingmaður Sjálfstæðisflokksins segir bankaskatt eiga eftir að bitna mest á skuldurum.

Bankaskattur hækkaður um 75 prósent

Áformað er að hækka bankaskatt úr 0,145 prósentum í 0,254 prósent eða því sem nemur rúmlega 75 prósenta hækkun í nýju fjárlagafrumvarpi. Með þessu er áformað að styrkja tekjugrunn ríkissjóðs.

Mest lesið


Fleiri fréttir

Sjá meira


×

Mest lesið