For­seti Ólympíusambands Pól­lands hand­tekinn

Rafmyntafyrirtækið Zondakrypto er aðalstyrktaraðili pólska Ólympíusambandsins en samningar þess efnis voru undirritaðir í fyrra. Ríkisstjórn Póllands hefur hafið rannsókn á Zondakrypto en fyrirtækið er grunað um að hafa tengsl við skipulagða glæpastarfsemi.

TVN24 í Póllandi greindi frá því í dag að Piesiewicz, forseti Ólympíusambandsins, hefði verið handtekinn sem hluti af rannsókninni og það hefur nú verið staðfest af dómsmálaráðherra Póllands, Waldemar Zurek.

Samkvæmt pólskum miðlum er Piesewicz sakaður um að hafa tekið við gjöfum, sem hann mátti ekki fá í sínu starfi. Þar eru nefndar peningagjafir frá forseta Zondakrypto, lúxusúr, ferðir til Mónakó og Bergamo, og miðar á fótboltaleiki.

Piesewicz, sem var áður forseti körfuknattleikssambands Póllands, neitar ásökunum. Óvíst er hvort hann verði ákærður en rannsókn málsins verður framhaldið.