Draumurinn rætist hjá Bergrós í dag á rosa­legum fyrsta keppnis­degi

Fyrsti dagurinn er enginn smá dagur fyrir okkar konu því það verða alls sjö greinar á dagskrá í dag.

„Aldrei gefast upp í því að elta draumana þína,“ skrifaði Bergrós og birti myndir af sér skrá sig inn á mótið.

Þar má sjá hana með mikinn fjölda af keppnisfatnaði sem hún fékk afhentan auk þess sem hún sýnir frá því þegar hún fór í myndatöku og viðtöl.

Bergrós veit hvernig sex af sjö greinum dagsins líta út en það er ekki enn búið að tilkynna lokagrein dagsins.

Þetta eru tuttugustu heimsleikarnir í sögunni og í tilefni af þeim tímamótum verður fyrsta greinin grein sem keppt var í á fyrstu heimsleikunum árið 2007. Greinin heitir „The 2007 Hopper“.

Á fyrstu CrossFit-leikunum árið 2007, sem haldnir voru á búgarði Dave Castro í Aromas í Kaliforníu, notuðu skipuleggjendur bókstaflegan lottókassa til að ákvarða fyrstu keppnisgreinina. Hreyfingar og æfingaþættir voru settir ofan í hann og síðan dregnir af handahófi á keppnisdegi.

Æfingin sem kom upp úr pottinum var „The 2007 Hopper“. Hún býður upp á þúsund metra róður og síðan fimm umferðir af upphífingum og spyrnulyftum en þessi krefjandi grein varð ein af þekktustu þrekraunum í sögu CrossFit-leikanna.

Fyrsta greinin hefst klukkan níu fyrir hádegi á staðartíma í Kaliforníu eða klukkan fjögur á íslenskum tíma.