Hall­dór Árni Sveins­son er látinn

Það var sonur hans, Hörður Brynjar Halldórsson, sem tilkynnti andlát hans á Facebook. Halldór Árni, sem var einstakur húmoristi, hefur átt við vanheilsu að stríða undanfarin ár og hann sá ástæðu til að gefa út sérstaka tilkynningu á Facebook þar að lútandi nýverið en gat ekki stillt sig um að snúa tilkynningunni upp í gamanmál að hætti hússins:

„Ástæða þess að ég hef lítið sést í miðbæ Hafnarfjarðar að undanförnu er vegna stuttrar sjúkrahúslegu sem er mitt einka- og hjartans mál, og hefur ekkert að gera með lengingar eða styttingar af neinu tagi, enda lengi talinn með stærri og að vallarsýn þreknari mönnum.

Og vegna orðróms um að ég hafi leitað til snyrtistofu til að breyta útliti mínu þá er það alger þvættingur, en vissulega hafði ég gert mér vonir um að starfsmenn stofunnar gætu lengt á mér stutt nefið, sem vel að merkja tókst ekki.

Þá hafa óábyrgir aðilar haft í flimtingum stuttan atvinnuferil minn sem jólasveins á áttunda áratug síðustu aldar, ásamt tveimur vinum mínum sem voru í hlutverki Hurðarskellis og Skyrgáms. Svo því sé haldið til haga var ég þá einungis í hlutverki Kjötkróks – aldrei, og ég meina aldrei Stúfs.

Annað var það nú ekki.”

Fáir er nokkrir voru eins tryggir heimabæ sínum Hafnarfirði og Halldór Árni. Hann helgaði sig beinlínis Firðinum og miðaði allt sitt starf við að skrá flest sem þar fór fram – heimildagildi starfs hans sérstaklega fyrir Hafnfirðinga er ómetanlegt. Halldór Árni gekk í Flensborg en fékk fljótlega áhuga á fjölmiðlun og stofnaði til að mynda Útvarp Hafnarfjörð sem hann rak um árabil. Hann kom sér fljótlega upp kvikmyndatökuvélum og beindi vélinni að flestu því sem hann taldi merkilegt á hafnfirska vísu: menningarviðburðum og bæjarstjórnarfundum.

Halldór var drátthagur, hann fékkst við myndlist og setti upp sýningar. Á seinni árum ævi sinnar fór hann í Kennaraháskólann, nældi sér í kennsluréttindi og kenndi í framhaldi af því nemendum Flensborgarskóla fjölmiðlafræði.

Ýmsir minnast Halldórs Árna Sveinssonar á Facebook og nefna flestir það sama, að hann hafi verið öflugasta menningarstofnun Hafnarfjarðar. Árum saman myndaði hann og birti efni af ríku mannlífi bæjarins og skóp með störfum sínum ómetanleg menningarverðmæti.