Joey Chestnut gleypti 66 pylsur og vann í á­tjánda sinn

Methafinn Joey Chestnut gleypti 66 pylsur og vann sinn átjánda sigur í keppninni, en Miki Sudo borðaði 38,75 pylsur og vann sinn tólfta sigur, sem er met hjá konunum.

„Ég vissi að ég myndi sigra,“ sagði Chestnut og bætti við: „Ég á enn nóg pláss.“

Chestnut sigraði þrettán keppinauta sem komu víðs vegar að úr landinu og heiminum, meðal annars frá Tékklandi, Ástralíu og Suður-Kóreu. Hann sigraði með yfirburðum keppandann í öðru sæti, Patrick Bertoletti, sem borðaði 50 pylsur.

Hann náði ekki meti sínu, sem er 76 pylsur, og viðurkenndi að hitabylgja gæti hafa haft einhver áhrif og að „það væri svigrúm til úrbóta“.

Keppendur borða eins margar pylsur og brauð og þeir geta á tíu mínútum og dýfa pylsunum oftast í vatn til að auðvelda kyngingu.

Hin fertuga Sudo á kvennametið sem er 51 pylsa og var sett árið 2021.

Eftir keppnina á laugardag blandaði Sudo sér í mannfjöldann til að horfa á eiginmann sinn keppa í karlaflokki – en hann bað hennar árið 2021 strax eftir að hafa borðað 50 soðin egg á rúmum 3 mínútum og sett heimsmet.

„Ég sagði bara að ég yrði að treysta á vöðvaminnið og áhorfendur báru mig í gegn að enn einum sigrinum í dag,“ sagði Sudo.

Viðburðurinn, sem á rætur að rekja til ársins 1972, er haldinn fyrir framan upprunalega veitingastaðinn Nathan's Famous á Coney Island í New York.