Dagurinn hans Ounahi og Marokkó fyrst í átta liða úr­slit

Marokkómenn tryggðu sér fyrstir liða sæti í átta liða úrslitum heimsmeistarakeppninnar í knattspyrnu eftir 3-0 sigur á Kanada í fyrsta leik sextán liða úrslitanna í kvöld.

Kanadamenn eru því fyrstu gestgjafarnir til að detta úr leik á þessu móti en Bandaríkin og Mexíkó eiga eftir að spila í sextán liða úrslitunum.

Marokkó er að komast svona langt á öðru HM í röð en fyrir fjórum árum fór liðið alla leið í undanúrslit. Liðið mætir anannaðhvortrakklandi eða Paragvæ í átta liða úrslitunum.

Azzedine Ounahi var maður leiksins en hann skoraði bæði mörkin í seinni hálfleiknum eftir að Marokkó hafði misst markahæsta manninn sinn, Ismael Saibari, meiddan af velli í fyrri hálfleik. Það var áfall fyrir Marokkó en það var líka slök frammistaða liðsins fyrir hlé.

Þetta er því grátleg niðurstaða fyrir Kanadamenn sem voru mun betra liðið í fyrri hálfleik en tókst ekki að nýta það og skora mark. Þeir fengu á sig mark gegn gangi leiksins og misstu trú eftir það.

Marokkómenn tóku til hjá sér í hálfleiknum og voru síðan fljótir að skora í þeim síðari en Ounahi skoraði á 50. mínútu. Achraf Hakimi tók þá sniðuga aukaspyrnu en í stað þess að senda boltann inn í markteiginn þá gaf hann boltann þvert út í teiginn þar sem Ounahi kom á ferðinni og skoraði með laglegu skoti.

Eftir markið mátti sjá mikinn mun á orkustigi kanadíska liðsins og þeir áttu erfitt uppdráttar eftir það.

Ounahi skoraði sitt annað mark á 82. mínútu og gerði nánast endanlega út um leikinn. Hann fékk þá boltann frá Brahim Díaz eftir skyndisókn og skoraði aftur laglega.

Soufiane Rahimi skoraði þriðja markið á áttundu mínútu í uppbótartíma eftir aðra stoðsendingu frá Brahim Díaz sem er nú kominn með fjórar slíkar á HM í ár.