„Skemmir bara fyrir báðum liðum og bara leiðin­leg upp­á­koma“

„Við gerum vel í vörn, Rúnar setur upp varnarplan og við framkvæmum það bara þokkalega“ sagði Veigar Páll Alexandersson eftir sigurinn í kvöld.

„Við spiluðum betri sóknarleik í seinni hálfleik klárlega og ég held að það hafi bara svolítið skilað þessu“

Njarðvíkingar eltu lengst af í leiknum en náðu að snúa leiknum sér í hag undir lok þriðja leikhluta og voru betri í fjórða leikhluta.

„Við hættum aldrei. Við höldum áfram að berjast, við viljum vinna þetta og Rúnar sagði okkur að halda bara áfram og við héldum okkur við leikplanið og þá endar þetta svona“

Atvikið sem verður kannski mest rætt og ritað um í leiknum átti sér stað þegar um tvær mínútur voru eftir af leiknum og allt sauð uppúr þegar Dwayne Lautier-Ogunleye var að bera upp boltann og lenti svo saman við Deandre Kane sem skapaði heldur mikið fjaðrafoki.

„Menn eru eitthvað að hrinda hvor öðrum og taka illa í það þegar það er hrint liðsfélögunum og lætur það bitna á liðinu. Menn þurfa bara aðeins að einbeita sér“

„Þetta má ekki gerast og á ekki að gerast. Þetta skemmir bara fyrir báðum liðum og bara leiðinleg uppákoma“

Það voru ekki margir sem gáfu Njarðvíkingum mikinn séns í þessari seríu fyrir fram en þeir eru heldur betur að minna á sig og þessi sigur gefur liðinu helling.

„Þetta gefur okkur heilan helling. Við vorum að fagna hérna og ef við vinnum annan leik þá bara fögnum við svona og ef við vinnum næsta þá fögnum við“

Með sigri Njarðvíkur í kvöld eru þeir búnir að „stela“ heimavallaréttinum í bili hið minnsta.

„Við ætlum bara að mæta á mánudaginn dýrvitlausir og vernda heimavöllinn, það er bara þannig“ sagði Veigar Páll Alexandersson.