Páskarnir líta þokka­lega út þrátt fyrir kulda

Útlit er fyrir að veðrið lagist á föstudaginn langa, en óljósara er hvernig laugardagur og páskadagur þróast. Að svo stöddu bendir þó ekkert til annars en að páskaumferðin sleppi nokkuð vel miðað við það sem á undan er gengið í vetur.

Þá virðist kuldinn ætla að haldast fram yfir páska. Veðurfræðingurinn segir veturinn hafa komið svo seint að hann sé enn inni í kortunum og því verði áfram kalt næstu daga, þótt miðvikudagurinn líti ágætlega út.

Á miðvikudag:

Vestan og norðvestan 10-15 m/s á Norðaustur- og Austurlandi og stöku él, en hægari vindur annars staðar og þurrt. Frost 0 til 5 stig, en frostlaust við suður- og vesturströndina að deginum. Vaxandi suðaustanátt á Suður- og Vesturlandi um kvöldið og þykknar upp með dálítilli snjókomu eða slyddu.

Á fimmtudag:

Suðaustan 13-20, en snýst í hægari vestanátt á Suður- og Vesturlandi seinnipartinn. Slydda eða snjókoma með köflum, en úrkomulítið á Norðurlandi. Hiti um eða yfir frostmarki.

Á föstudag:

Breytileg átt og líkur á éljum, einkum við sjóinn. Frost 0 til 5 stig.

Á laugardag:

Austlæg eða breytileg átt. Snjókoma eða slydda sunnanlands, annars víða él. Hiti um eða undir frostmarki.

Á sunnudag:

Austlæg eða breytileg átt og él í flestum landshlutum. Hiti breytist lítið.