Besta sætið: Aðstoðarþjálfari sem er ekki þjálfari og ó­vænt upp­á­koma eftir­lits­manns

Henry Birgir Gunnarsson, Aron Guðmundsson og Ágúst Orri Arnarson settust fyrir framan hljóðnemann í dag og fóru yfir málin.

Afar sérstök uppákoma átti sér stað í úrslitakeppni Olís-deildar karla í gær. Eftirlitsmaður HSÍ, Hlynur Leifsson, neitaði þá að hefja seinni hálfleik fyrr en stuðningsmenn Fram hefðu fært sig. Það úr sætum sem þeir víst máttu sitja í. Því var eftirlitsmaðurinn ekki sammála.

Á blaðamannafundi kvennalandsliðsins í fótbolta í dag kom fram að KSÍ þyrfti ekki að gera neinar breytingar varðandi kröfu FIFA um aðstoðarþjálfara. UEFA hefði verið með þessar reglur í nokkur ár og KSÍ fylgt því.

Þorsteinn Halldórsson landsliðsþjálfari sagði að Gunnhildur Yrsa Jónsdóttir væri aðstoðarþjálfari hjá liðinu. Hún hefur hingað til verið titluð styrktarþjálfari og hefur aldrei þjálfað. Nokkuð sérstakt og strákarnir renndu yfir þetta mál.

Svo var rennt yfir lokahóf KKÍ sem fór fram í dag og spáð í spilin fyrir úrslitakeppni Bónus-deildar karla.

Besta sætið er aðgengilegt á öllum helstu hlaðvarpsveitum. Það kemur út alla virka daga.