Vegurinn á Bola­fjall ekki lengur á á­byrgð utan­ríkis­ráðu­neytisins

Frá árinu 1985 hefur utanríkisráðuneytið haft á leigu landsvæði frá Bolungarvíkurkaupstað á Bolafjalli vegna reksturs ratsjárstöðvar, en vegur upp að stöðinni var lagður í kjölfarið.

Í tilkynningu á vef utanrríkisráðuneytisins segir að varnarmálasvið Landhelgisgæslunnar fari með daglegan rekstur ratsjárstöðvarinnar og hafi auk þess sinnt viðhaldi vegarins í umboði utanríkisráðuneytisins.

„Vegurinn hefur verið opinn almennri umferð á sumrin, en þannig hefur verið tryggt aðgengi að vinsælum útsýnispalli á toppi Bolafjalls, sem tekinn var í notkun 1. september 2022. Síðan þá hefur umferð um fjallið stóraukist yfir sumartímann með tilheyrandi aukningu á viðhaldskostnaði.

Með samkomulaginu sem undirritað var í dag hefur Bolungarvíkurkaupstaður nú tekið yfir rekstur og viðhald vegarins í samráði við utanríkisráðuneytið og varnarmálasvið LHG og hyggst sveitarfélagið ráðast í framkvæmdir á veginum til að tryggja umferðaröryggi,“ segir í tilkynningu á vef ráðuneytisins.

Þorgerður Katrín Gunnarsdóttir utanríkisráðherra segir að þetta sé samkomulag sem gagnist öllum hlutaðeigandi, þar sem nú geti Bolvíkingar byggt upp frekari ferðaþjónustu með því að fjárfesta í veginum til að gera hann enn aðgengilegri fyrir þær þúsundir ferðamanna sem heimsæki Bolafjall á hverju ári til að upplifa hið ólýsanlega útsýni sem við blasir uppi á fjallstindinum. 

„Á sama tíma er aðgengi starfsfólks að ratsjárstöðinni tryggt og samráð okkar við sveitarfélagið um opnun og lokun vegarins þegar svo ber undir fest í sessi,“ er haft eftir Þorgerði.