Gómaður á ÓL eftir sex­tán ár á flótta

Ítalski miðillinn ANSA greinir frá handtökunni og segir manninn eiga eftir að afplána 11 mánuði og 7 daga af fangelsisdómi sem hann hlaut árið 2010 fyrir þjófnað.

Maðurinn hafði ferðast frá heimalandinu Slóvakíu til Ítalíu en viðvörunarbjöllur hringdu þegar hann skráði sig inn á hótel í Baggio héraðinu. Hótelið sá að handtökuskipun hafði verið gefin út á hendur honum og lét lögreglu vita.

Lögreglan lét svo til skarar skríða á Santagiulia leikvanginum, rétt áður en Slóvakía vann mjög óvæntan 4-1 sigur gegn Finnlandi. 

Svekkelsið var því margfalt fyrir þennan slóvakíska mann, sem er á leiðinni í fangelsi og missti af stjörnuframmistöðu Juraj Slafkovský, sem skoraði tvö mörk og gaf stoðsendingu í sigri Slóvaka.