Upp­gjörið: Njarð­vík - Haukar 80-102| Ís­lands­meistararnir pökkuðu efsta sætinu

Njarðvík tók á móti Íslandsmeisturum Hauka í 9. umferð bónus deild kvenna í kvöld. Þessi lið mættust í úrslitaeinvíginu um Íslandsmeistaratitilinn á síðasta tímabili. Haukar kjöldrógu Njarðvíkinga í kvöld og fóru með öruggan og sannfærandi sigur 80-102.

Leikurinn fór fjörlega af stað og mætti lið Hauka af krafti til leiks. Þær spiluðu strax mjög agresíva vörn á Njarðvík sem átti fá svör.

Það mátti sjá mikinn kraft og vilja í liði Hauka sem hefur kannski aðeins vantað í síðustu leikjum liðsins. Eftir fyrsta leikhluta voru Haukar sannfærandi og sanngjarnt yfir 19-26.

Það var allt annað að sjá til lið Njarðvíkur í upphafi annars leikhluta. Þær fóru að líkjast því Njarðvíkurliði sem maður þekkir og náðu þessu fljótt í jafnan leik.

Haukar sýndu aftur á móti mikinn kraft og náðu að binda saman vörn og sókn eftir því sem leið á leikhlutann. Gestirnir fóru með níu stiga forystu inn í hálfleikinn 46-55.

Gestirnir byrjuðu þriðja leikhlutann vel og var Amandine Toi komin í 30 stig áður en fyrsta mínúta seinni hálfleiks var liðin.

Haukar voru með öll spjöld á hendi og átti Njarðvík fá svör við öflugum leik þeirra. Haukar náði mest 17 stiga forskoti í þriðja leikhluta en staðan að honum loknum var 66-78 Haukum í vil.

Öll von um einhverja endurkomu hvarf snemma í fjórða leikhluta þegar öll skot Hauka virtust rata ofan í. Þrír þristar í röð börðu alla trú úr Njarðvíkingum og Haukar gengu bara á lagið.

Haukar höfðu að lokum stórkostlegan og einstaklega verðskuldaðan 22 stiga sigur 80-102.

Atvik leiksins

Sólrún Inga Gísladóttir setti tvo þrista í röð í upphafi fjórða leikhluta sem drap alla trú og hugmyndir Njarðvíkur að einhverri endurkomu.

Stjörnur og skúrkar

Danielle Rodriguez skoraði 25 stig fyrir Njarðvík en heilt yfir átti liðið afar slakan leik í kvöld.

Dómararnir

Bjarki Þór Davíðsson, Jakob Árni Ísleifsson og Sófus Máni Bender voru á flautunni í kvöld.

Fæst orð bera minnstu ábyrgð var eitt sinn sagt. Þessi frammistaða í kvöld fer seint í sögubækurnar fyrir glæsileika. Þeirra frammistaða hafði þó enginn úrslitaáhrif í kvöld.

Stemingin og umgjörð

Viðtöl

„Erum óþekkjanlegar hérna í kvöld“

„Vonsvikinn. Fyrst og síðast“ sagði Einar Árni Jóhannsson þjálfari Njarðvíkur eftir tapið í kvöld. 

„Við erum óþekkjanleg hérna í kvöld að mínu viti bara eiginlega í gegnum fjörtíu mínútur“

Það var margt sem fór úrskeiðis hjá liði Njarðvíkur í kvöld en varnarleikurinn þótti ekki til útflutnings. 

„Það er mjög augljóst að benda á varnarleikinn. Þær eru að skjóta tæplega 70% frá tveggja og 44% í þriggja og þú vinnur ekki körfuboltaleiki þegar að þessar tölur eru uppi“

„Ég sagði fyrir leik að fyrir mér snérist þetta um varnarleik. Við vorum ekki góðar varnarlega á löngum köflum í síðasta leik og þetta var á móti mjög öflugu liði sem að var sært og kom bara af krafti og grimmd í þennan leik og við mættum því bara aldrei. Það verður bara að segjast alveg eins og er“

„Ég ætla ekkert að sykurhúða það neitt en við vorum bara aumar á allan máta hér í kvöld“ sagði Einar Árni Jóhannsson.