Hjóluðu 1300 kíló­metra með­fram Dón­á með börnum sínum

Þessi flotta fjölskylda hefur hjólað saman víða erlendis og alltaf haft jafn gaman að því að heimsækja ólík lönd og að upplifa náttúruna og umhverfið í hverju landi. Þau eru ný komin heim eftir eina slíka ferð.

„Heyrðu, við skelltum okkur í hjólaferð meðfram ánni Dóná og byrjuðum í Þýskalandi og enduðum í Búdapest, um 1300 kílómetrar,“ segir Sólveig Dröfn Andrésdóttir, hjólagarpur og sjúkraþjálfari í Hveragerði og bætir við. „Það gekk bara mjög vel, við vorum 23 daga“.

„Þetta er bara alveg frábær upplifun og skilur mikið eftir sig, góðar minningar,“ segir Einar Þorfinnsson, hjólagarpur í Hveragerði og lögreglumaður.

En er fjölskyldan á rafmagnshjólum eða bara þessum hefðbundnu hjólum?

„Gamaldags, já það er bara þetta hefðbundna. Það er líka auðveldara því þá þarf maður ekki að leita af hleðslustöð svo sem. Engin hleðslukvíði og maður þjálfar líkamann og sál í leiðinni“, segir Sólveig Dröfn.

Og þið voruð með öll börnin ykkar með, hvernig gekk það?

„Bara mjög vel, þau bara hjálpuðu okkur að halda dampi og gleðinni . Já, þau stóðu sig bara mjög vel og komin reynsla á að það gangi vel, það var ekkert vesen,“ sögðu Einar og Sólveig Dröfn.

Fjölskyldan hefur farið í nokkrar fleiri hjólaferðir til útlanda, meðal annar meðfram ánni Rín 2023 og svo hjóluðu þau í Danmörku 2024. Og þau eru nú þegar farin að plana hjólaferð á næsta ár en það er þó ekki alveg ákveðið hvert verður hjólað þá.

Og börnunum þeirra hjóna þykir alltaf mjög gaman að fara með foreldrum sínum í hjólaferðir en þau heita Örvar Þór, sem er 11 ára, Andrés Einar, sem er 7 ára og Unndís Eva, sem er 4 ára.