Prófuðu annað kjarnorkuknúið vopn

Tundurskeytið ber nafnið Poseidon, eftir gríska guði hafsins, og voru samkvæmt Pútín gerðar tilraunir með það í gær. Pútín sagði særðum hermönnum að tilraunirnar hefðu heppnast einkar vel.

Hann sagði tundurskeytinu hafa verið skotið af stað úr kafbáti og að vísindamönnum hefði tekist að ræsa kjarnaklúf tundurskeytisins.

Samkvæmt rússnesku fréttaveitunni TASS sagði Pútín að ekkert annað sambærilegt vopn væri til í heiminum og yrði ekki til um langt skeið. Hann hélt því einnig fram að ómögulegt væri að granda Poseidon þar sem tundurskeytið færi mjög hratt og gæti verið á miklu dýpi.

Rússar hafa haldið því fram að Poseidon gæti framkallað geislavirkar flóðbylgjur sem myndu gera heilu strandlengjurnar óbyggilegar. Raunverulegar upplýsingar um vopnið og hvernig eða hvort það virkar eru þó enn mjög takmarkaðar.

Fréttaveitan RIA segir að Poseidon sé tuttugu metrar að lengd, 1,8 metrar að breidd og um hundrað tonn að þyngd.

Talar oft um kjarnorkuvopn

Pútín og málpípur hans hafa ítrekað hótað notkun kjarnorkuvopna eða gefið hana í skyn vegna innrásar Rússa í Úkraínu.

Sjá einnig: „Vopnin eru til þess að nota þau“

Pútín stærði sig einnig af nýrri skotflaug sem ku geta borið kjarnorkuvopn og sagði að hún yrði brátt tekin í almenna notkun. Sú tegund eldflauga kallast Sarmat og sagði Pútín einnig að ekkert annað sambærilegt vopn væri til í heiminum.

Stutt er síðan Rússar gerðu tilraun með kjarnorkuknúna stýriflaug, sem þeir segja að hafi flogið fjórtán þúsund kílómetra á fimmtán klukkustundum og sýnt fram á getu til að komast hjá loftvarnarkerfum.

Við það tilefni sagði Pútín að um einstakt vopn væri að ræða.

Sjá einnig: Segja „fljúgandi Chernobyl“ hafa flogið í fimmtán klukkustundir

Forsetinn rússneski sagði hermönnum í morgun að þeir og aðrir Rússar mættu vera stoltir af afrekum vísindamanna og verkfræðinga í Rússlandi. Vísaði hann sérstaklega til stýriflaugarinnar kjarnorkuknúnu og sagði að kjarnaklúfur hennar væri einstaklega merkilegur.

Hann væri sambærilega öflugur og kjarnaklúfur kafbáts en „þúsund sinnum minni“.

Þessa tækni sagði Pútín að Rússar gætu notað víða. Hana yrði hægt að nota við orkuöflun innanlands, á tunglinu og til að knýja og kynda bækistöðvar á norðurslóðum.