Opna í Kaup­manna­höfn en loka loft­rýminu yfir Osló einnig vegna dróna­

Á svipuðum tíma og opnað var fyrir umferð við Kaupmannahafnarflugvöll var loftrýminu yfir Óslóarflugvelli lokað vegna sama vandamáls. Verður flugvélum þangað beint á næstu flugvelli, að sögn flugmálayfirvalda. Áður hafði verið greint frá því að dróni sem sást nálægt flugvellinum í Osló myndi ekki hafa áhrif á flugumferð.

Tillkynt var um lokunina í Osló klukkan 22:30 að íslenskum tíma og er norska lögreglan með viðbúnað á svæðinu. Lögreglan rannsakar nú hvort tengsl séu milli atvikana í Osló og Kaupmannahöfn. Fréttastofur DR og NRK greina frá þessu.

Danska lögreglan vill ekki upplýsa um aðgerðir sínar

Jakob Hansen, aðstoðarlögreglustjóri hjá lögreglunni í Kaupmannahöfn, sagði á blaðamannafundi í kvöld að tilkynning hafi borist frá flugmálastofnuninni Naviair um klukkan 20:30 að staðartíma um að loftrýminu hafi verið lokað eftir að drónar sáust á svæðinu. Lögreglan hafi sömuleiðis sjálf orðið vör við dróna í loftrýminu.

Hansen bætti við að lögreglan hafi byrjað ítarlega rannsókn á málinu í samstarfi við leyniþjónustu dönsku lögreglunnar PET, danska herinn og erlend yfirvöld. Ráðist hafi verið í fjölmargar aðgerðir en aðstoðarlögreglustjórinn vildi ekki útskýra hvers eðlis þær eru.

Drónarnir hafi að lokum yfirgefið svæðið en ekki verið teknir niður af yfirvöldum. Nú sé reynt að komast að því hvers konar dróna var um að ræða og hvaðan þeir komu. Lögreglan viti ekki hvert þeir stefni eftir að þeir yfirgáfu loftrýmið.

Óljóst hversu margir drónarnir voru

Danska lögreglan hafði áður greint frá því að tveir til þrír drónar hafi sést við flugvöllinn en Hansen sagði á blaðamannafundinum skömmu fyrir miðnætti að íslenskum tíma að á þessum tímapunkti væri ekki fyllilega ljóst hversu margir drónarnir voru.

„Við vildum óska ​​þess að við vissum hvar þeir væru á þessum tímapunkti en við miðum vinnu okkar við aðstæður hverju sinni,“ hefur DR eftir Jakob Hansen.

Hann sýni því skilning að fólk finni fyrir hræðslu þegar það heyri af óþekktum drónum í danskri lofthelgi. Engar vísbendingar séu um að drónarnir hafi reynst viðstöddum hættulegir. 

Hansen benti á að svipuð staða hafi komið upp í Osló og því muni danska lögreglan eiga náið samstarf við norsk yfirvöld, meðal annars til að rannsaka möguleg tengsl. Lögreglan verði áfram með viðbúnað á flugvellinum í Kaupmannahöfn. Danska lögreglan hefur boðað til annars blaðamannafundar vegna málsins klukkan 5 í fyrramálið að íslenskum tíma. 

Fréttin hefur verið uppfærð eftir blaðamannafund dönsku lögreglunnar.