Marka­metið hans Patricks Peder­sen í tölum

Pedersen gerði betur en að bæta metið í gær því hann skoraði tvö mörk í 2-2 jafntefli Valsmanna upp á Akranesi. Þetta var hans tuttugasta tvenna í efstu deild.

Það voru liðnir 4381 dagar síðan að Pedersen skoraði sitt fyrsta mark í deildinni á móti Fram á Laugardalsvellinum 7. ágúst 2013. Það vantaði bara tvo daga að það væru liðin nákvæmlega tólf ár.

Flest fyrir Óla Jóh

Pedersen skoraði fyrstu ellefu mörkin sín fyrir þjálfarann Magnús Gylfason en flest hefur hann skorað fyrir Ólaf Jóhannesson eða 47 talsins. Þetta voru mörk númer 21 og 22 fyrir Srdjan Tufegdzic en hann hefur einnig skorað fyrir Heimi Guðjónsson (27) og Arnar Grétarsson (26).

Pedersen hefur skorað sautján mörk í Bestu deildinni sem er það mesta sem hann hefur skorað á einni leiktíð. Sá danski náði því einnig sumarið 2018 og í fyrra. Pedersen á að baki sex tímabil með tólf eða fleiri mörk og hefur alls skorað á tólf tímabilum í efstu deild á Íslandi.

Hundrað mörk með hægri

Pedersen hefur skorað nákvæmlega hundrað af þessum mörkum með hægri fæti, hann hefur skorað sautján þeirra úr vítaspyrnum, 33 hafa komið úr markteignum en aðeins ellefu þeirra utan teigs.

Sextán markanna hafa komið með skalla og sautján með vinstri fæti en þar á meðal var markið þar sem hann bætti metið.

67 af mörkunum hans Pedersen hafa verið skoruð í fyrstu snertingu en aðeins fimm eftir fleiri en fjórar snertingar.

Flest mörk á sunnudögum

Hann hefur skorað flest mörk í ágústmánuði eða 32 talsins og flest þeirra á sunnudögum eða 49. Hann meira að segja tvöfaldaði markaskor sitt á þriðjudögum í gærkvöldi, fóru úr tvö í fjögur.

Pedersen hefur skorað á móti tuttugu félögum og á tuttugu mismunandi leikvöllum. Þetta voru mörk númer fjórtán og fimmtán á móti ÍA og hann er nú kominn með fimm mörk á Akranesvelli. Flest mörk hefur hann skorað á móti KR eða sextán og langflest markanna hafa komið á Valsvellinum eða 68.

Miklu fleiri mörk á gervigrasi

Pedersen skoraði tvö mörk í fyrri hálfleik og er næstum því með jafnmörg mörk í fyrri hálfleik (65) og þeim síðari (68).

Hann hefur aftur á móti skorað mun fleiri mörk á gervigrasvöllum (84) en á grasvöllum (49) þrátt fyrir þessi mörk á grasvelli Akurnesinga í gær.

Hér fyrir neðan er aðeins farið yfir tölurnar á bak við mörkin 133 hjá Pedersen.