„Þetta var al­gjört bíómyndamóment“

Þórdís Erla giftist Kristjáni Jóni Pálssyni sem er stafrænn hönnuður hjá Hugsmiðjunni en einnig reka hjónin saman hönnunarstúdíóið Stúdíó Flötur. Blaðamaður ræddi við Þórdísi um stóra daginn.

Hvenær og hvernig trúlofuðust þið?

Við áttum bara mjög heimilislegt augnablik árið 2019, vorum að borða saman nautasteik og drekka rauðvín heima meðan stelpan okkar svaf inn í herbergi. 

Við vorum búin að vera saman í fimm ár og vinir í tíu ár og ákváðum að það væri kannski bara gaman að gifta okkur og halda partý.

Hvað voruð þið búin að vera lengi að skipuleggja stóra daginn?

Við ætluðum að gifta okkur 2020, vorum búin að finna sal og byrjuð að plana á fullu þegar að fréttirnar fóru að verða skrítnari og skrítnari. Um það leyti sem við ætluðum að senda boðskortin var fyrsta samkomutakmörkunin þannig að við ákváðum að fresta öllu skipulagi þangað til að allt róaðist.

Þegar við sáum að það yrði langt í að lífið yrði venjulegt aftur ákváðum við frekar að nýta peninginn sem við höfðum safnað fyrir brúðkaupinu í að kaupa íbúð. Svo kom litli strákurinn okkar í heiminn 2021 þannig að við vildum bíða þangað til hann væri orðinn stærri.

Við ákváðum að gifta okkur hjá sýslumanni á 10 ára sambandsafmælinu okkar fyrsta vetrardag 2025. Við héldum svo smá sýslumannspartý heima hjá okkur eftir það fyrir vini, hálfgert „rehearsal party“.

En skipulagningin fyrir stóra partýið byrjaði fyrir alvöru svona tveimur mánuðum fyrir stóra daginn, við vorum ansi slök þangað til við föttuðum hvað það væri orðið stutt í þetta og fórum þá á fullt í að gera og græja.

Hvernig var brúðkaupsdagurinn?

Við vöknuðum og gáfum hvoru öðru morgungjöfina. Kristján fór af stað að græja salinn með góðum flokki af vinum og fjölskyldu. Á meðan fékk ég mömmu, tengdamömmu, mágkonu mína og systur heim í smink og áttum skemmtilega stund saman.

Svo kom ljósmyndarinn okkar Owen Fiene heim og tók nokkrar fallegar fjölskyldumyndir af okkur að hafa okkur til með börnunum. Við lögðum af stað í Hellisgerði upp úr klukkan 14 og fórum á gömlum Benz sem pabbi á. Það var rosa gaman að keyra á honum í Hafnarfjörð í okkar fínasta pússi.

Athöfnin var við tjörnina í Hellisgerði klukkan 15. Það hafði verið rigningarspá alla vikuna en um leið og athöfnin byrjaði fór sólin að skína, algjört bíómyndamóment. 

Gestirnir fengu freyðivín þegar þau komu í garðinn og tónlistarteymið, vinkona mín Ingibjörg Elsa Turchi og eiginmaður hennar Hróðmar Sigurðsson, spiluðu ljúfa tóna á meðan.

Við löbbuðum niður lítinn stíg undir brúðarvalsinum og komum okkur fyrir á brú fyrir ofan litla tjörn og foss í bakgrunni þar sem að vinur okkar Kolbeinn Tumi frá Siðmennt gaf okkur saman. Frænka mín Guðrún Ásgeirsdóttir söng L’amour est bleu og svo í lok athafnarinnar sungu hún og systir mín Kristjana Zoëga Það ert bara þú.

Fylkingin rölti svo strandlengjuna í Ægi 220 sem er við smábátahöfnina í Hafnarfirði þar sem að við borðuðum líbanskan mat sem var settur á borðin og svo spilaði Kossanova, nýjasta stuðbandið í bænum, fyrir balli og Mr. Silla endaði á að þeyta skífum.

Voruð þið sammála í skipulaginu?

Já, við vorum alltaf nokkurn veginn á sömu blaðsíðu. Okkur langaði fyrst og fremst að halda skemmtilegt og eftirminnilegt partý fyrir fólkið okkar.

Hvaðan sóttuð þið innblástur?

Við erum búin að mæta í mörg skemmtileg brúðkaup hjá vinum og tókum innblástur frá þeim hvað okkur langaði til að gera í okkar. Okkur langaði í „rustic“ sal sem fólk gæti slakað á í, nenntum ekki alveg sveitabrúðkaupi samt.

Ægir 220 var góð lending þar sem að við elskum Hafnarfjörðinn og gaman að taka smá „ferðalag“ af Seltjarnarnesinu þangað. 

Mér finnst skemmtilegt þegar gestir geta haldið hópinn eftir athöfnina þannig að dásamlega fallegi garðurinn Hellisgerði var sniðugur sem fyrsta stopp á deginum.

Hvað stendur upp úr?

Athöfnin í Hellisgerði var bara magic moment. Allt gekk upp! Svo var ógeðslega gaman að dansa við Kossanova. Þau nýttu alla extrovertana í veislunni til að taka lagið þannig að úr urðu geggjaðir tónleikar.

Sáu einhverjir um veislustjórn og voru skemmtiatriði?

Já, frænka mín og flex cult-leader Sigríður Ásgeirsdóttir og vinur okkar og lífskúnstner Sigmann Þórðarson voru geggjað veislustjórnarteymi. Þau þekkja okkur og fjölskyldu og vini sjúklega vel þannig að þau vissu alveg hvað virkaði. 

Það voru fallegar ræður eftir foreldra og vini og einnig söng- og dansatriði. Við búum svo vel að eiga mjög hæfileikaríka vini og fjölskyldu sem gerðu daginn ógleymanlegan

Var eitthvað sem kom ykkur á óvart?

Ég er alveg ágætlega sjóuð í að skipuleggja viðburði, en þetta er alveg next level! Það þarf að skipuleggja hvert móment og flæðið í dagskránni mjög vel svo að það verði enginn klaufaskapur. 

Einnig (kom nú ekki endilega á óvart) hvað við eigum æðislega fjölskyldu og vini og hvað allir voru tilbúnir til að taka þátt og hjálpa.

Hvað voru margir gestir?

Þegar við byrjuðum að plana vorum við með næstum 200 manns á lista, en svo þurftum við bara að sníða stakk eftir vexti. Gestalistinn endaði í 120 eftir smá afföll, og það var mjög þægileg tala til að vinna með í þessum sal, sérstaklega fyrir sitjandi borðhald.

Það er rosalega erfitt að bjóða í brúðkaup og maður var alltaf að fatta fleiri sem mann langaði að bjóða.

Hvernig gekk að velja kjólinn?

Ég var með vissa sýn á hvernig mig langaði að vera. Ég elska hekl og grófa blúndu og finnst hún vera mjög myndræn. 

Ég hef líka alltaf elskað slör, var einu sinni brúður á Öskudag bara til að geta gengið með slör heilan dag.

Ég endaði á að panta kjól á netinu sem ég fann í lítilli búð í Porto. Kjólinn fann ég með því að gera google image search með svipaðan kjól. Slörið var frá Etsy og einnig undirkjóllinn.

Kristján keypti fötin sín í Húrra. Hann ætlaði sér að láta sníða á sig föt en fann svo bara akkúrat sniðið og lúkkið sem hann var að leita að. Einnig lét hann sérgera derhúfur með K+Þ logo-inu sem hann hannaði og bar á brúðkaupsdaginn.

Ertu með eitthvað gullið ráð fyrir verðandi hjón sem eru að skipuleggja brúðkaup?

Reyna að vera nokkuð tímanlega í að panta þjónustu sem þið vitið að þið pottþétt viljið, t.d. kokka, ljósmyndara, DJ eða hljómsveit.

Ætlið þið í brúðkaupsferð?

Já, við ætlum til Parísar. Allt þetta brúðkaupsferli var ekkert sérlega línulegt hjá okkur þannig að okkur fannst skemmtileg tilhugsun að taka brúðkaupsferðina í borg ástarinnar