City búið að semja um kaup­verð á Reijnders

Hollendingurinn er nýbúinn að framlengja samning sinn við AC Milan en félagið er sagt tilbúið að selja hann fyrir 55 milljónir evra. The Athletic greinir frá. Reijnders var öflugur fyrir félagið á tímabilinu, skoraði fimmtán mörk í öllum keppnum og var valinn besti miðjumaður ítölsku úrvalsdeildarinnar.

City er í miðjumannsleit eftir að Kevin De Bruyne tilkynnti að hann yrði ekki áfram hjá félaginu, skipti hans til Napoli eru yfirvofandi en hafa dregist á langinn og verða væntanlega ekki frágengin fyrr en eftir landsleikjahlé.

City hefur þó nýlega endurheimt spænska miðjumanninn Rodri, besta leikmann heims, sem sleit krossband en sneri aftur á völlinn í næstsíðasta leik ensku úrvalsdeildarinnar. City keypti líka spænska miðjumanninn Nico González frá Porto í janúar.

Reijnders er í hollenska landsliðshópnum sem á leiki framundan gegn Finnlandi á laugardag og Möltu á mánudag. Ganga þarf frá félagaskiptum fyrir þriðjudaginn 10. júní ef hann á að taka þátt í HM félagsliða sem hefst 15. júní.