Ráð­herra skoðar frekari girðingar á strand­veiðar

Strandveiðarnar hefjast næstkomandi mánudag, eftir sex daga, og sóttu tæplega níuhundruð bátar um strandveiðileyfi að þessu sinni, fleiri en nokkru sinni fyrr.

Jens Garðar Helgason, þingmaður Sjálfstæðisflokksins, vakti athygli á því í fyrirspurnatíma á Alþingi í gær að ef ríkisstjórnin ætlaði að standa við það að tryggja öllum 48 daga veiði myndi vanta milli 15.000 og 20.000 tonn upp í strandveiðipottinn. Hann spurði hvar ráðherrann ætlaði að finna þessi tonn og ef þau fyndust ekki, hvort ráðherra ætlaði þá að stöðva veiðarnar þegar potturinn væri búinn.

Hanna Katrín Friðriksson atvinnuvegaráðherra sagði að Fiskistofa væri að fara yfir umsóknir og athuga hversu mörg leyfin yrðu. Sest yrði yfir þau úrræði sem ráðuneytið hefði, eins og að tína til heimildir sem þegar væru til staðar.

„En það liggur alveg ljóst fyrir að við þurfum líka að horfa til þess hvort nauðsynlegt sé setja frekari girðingar til að tryggja sjálfbærni veiðanna. Þetta er viðfangsefnið sem við stöndum frammi fyrir. Við erum með nokkur atriði til skoðunar,“ sagði ráðherrann.

Jens Garðar sagði svarið heldur þunnt.

„Það er alveg greinilegt að það er ekki komin nein mynd á það hvar eigi að finna þessi 15.000–20.000 tonn. Það getur vel verið að það eigi að prenta einhvern smá kvóta með því að gefa út meiri síld.

En það er alveg á hreinu, og ég held að það sé bara mjög gott að vita fyrir þá sem hyggjast núna fara á strandveiðar, að ríkisstjórnin er strand í þessu máli og getur ekki gefið út 15.000–20.000 tonn, getur ekki fundið þau af því að allar aðrar aflaheimildir sem falla núna undir 5,3 prósentunum eru nú þegar bundnar í lögum eða í byggðakvóta, sértækum byggðakvóta og annað og því verður ekki hreyft,“ sagði Jens Garðar.

„Það er þunnt svarið, segir háttvirtur þingmaður. Ég fór yfir það að við erum að bíða eftir að fá endanlega tölu og mér líður betur með að hafa hana fasta í hendi á meðan við förum síðan að útfæra nánar þær leiðir sem við höfum til staðar þannig að það liggur nú bara fyrir. En það þarf að fara í einhverjar breytingar,“ sagði Hanna Katrín Friðriksson atvinnuvegaráðherra.