Með engan á­huga á kyn­lífi og vill ekki ræða það

Það er eðlilegt að þrá snertingu, nánd, kynlíf og samtal við maka. Flest gerum við ráð fyrir því að sambandið okkar komi til með að þróast og breytast með árunum. Fæst búast þó við því að einn daginn líði okkur eins og við búum með ókunnugri manneskju. Um miðjan aldur getur ýmislegt tengt kynlífi breyst en staðan eins og þú lýsir henni hljómar flóknari en einfaldar skýringar geta náð utan um.

Þar sem ég hef í raun engar frekari upplýsingar er erfitt að meta þær aðstæður sem uppi eru núna. Ýmsar spurningar koma upp í hugann; hvenær byrjaði þessi fjarlægð? Kom eitthvað upp á sem þú tengir við upphaf þessa tímabils? Hafið þið nýverið upplifað áföll? Hvernig er andleg og líkamleg heilsa hans? 

Ef þú værir að lýsa skyndilegri breytingu sem tengist bara kynlífi myndi ég velta ýmsu fyrir mér; hormónum, þunglyndi/kvíða, risvanda, streitu eða vandamál sem tengjast parasambandinu. Allt ofan talið kemur til greina en sennilega býr fleira að baki þar sem hann er búinn að draga sig í hlé frá allri líkamlegri nánd.

Viðbragðsleysi

Þegar við erum að takast á við streituvekjandi aðstæður, hvort sem þær tengjast sambandinu beint eða óbeint getur verið að við endum í viðbragðsleysi. Þegar ósjálfráða taugakerfið telur öruggast fyrir okkur að dofna, aftengjast umhverfinu okkar, einangra okkur og reyna ekki að hafa áhrif á stöðuna- má segja að við séum í viðbragðsleysi. 

Þetta birtist oft eins og þunglyndi þar sem viðkomandi á erfitt með að tjá líða sína og er áhuga- og orkulaus. Þetta viðbragð er leið líkamans til að takast á við yfirþyrmandi eða sársaukafullar tilfinningar.

Í langtíma sambandi þar sem ekki hefur tekist að vinna úr erfiðleikum getur verið að annar eða báðir aðilar enda í uppgjöf eða viðbragðsleysi. Því velti ég því fyrir mér hvort þið hafið lent í erfiðleikum sem ykkur hafi ekki tekist að leysa úr? 

Það er gott að staldra við og skoða hvernig samskipti ykkar hafa verið fram að þessu? Einkennast samskiptin af mikilli gagnrýni, höfnun eða gerið þið lítið úr líðan hvors annars? Er mikið um ágreining? Farið þið í vörn í samskiptum ykkar? Hversu öruggt er að berskjalda sig í sambandinu?

Hvað get ég gert?

Hverju tókst þú eftir hjá þér þegar þú byrjaðir að finna þessa fjarlægð? Þegar maki dregur sig í hlé kemur oft upp ótta tilfinning hjá þeim sem skilin er eftir. Það er ekki óalgengt að við reynum allt til að fá samtal, svör eða til að finna aftur tengingu við maka. Það eru eðlileg viðbrögð við þeim aðstæðum sem þú lýsir. 

Þegar ég les að þú hafir orðað það við hann að leita annað eftir kynlífi, velti ég því fyrir mér hvort þú hafir í raun verið að þrá viðbragð frá honum! Loks myndi hann snúa sér að þér og biðja þig um að gera það ekki! Oft reynum við allt til að fá eitthvað viðbragð eða svar.

Finndu leiðir til að ná betri ró

Þó að það sé skiljanlegt að vilja reyna allt til að að fá einhver svör er mikilvægt að finna leiðir til að róa niður þitt taugakerfi þegar á reynir. Notaðu aðferðir sem kjarna þig í augnablikinu; einblíndu á skynfærin þín; hvaða hluti sérðu í kringum þig, hvaða hljóð heyrirðu, hvaða hluti getur þú snert, hvaða lykt og hvaða bragð finnur þú? Andaðu djúpt í magann, því djúp öndun er góð leið til hægja á.

Gerðu hluti fyrir þig

Ég veit að það er ekki það sama að fara út með vinkonum eins og að finna nánd frá maka. En reyndu að rækta þau tengsl sem þú hefur fyrir utan sambandið, hreyfðu þig og gerðu skemmtilega hluti eða prófaðu eitthvað nýtt.

Það er klárt að þið þurfið aðstoð; pararáðgjöf og/eða einstaklings meðferð. Hann þarf að skoða hvaða þættir eru að hafa þessi áhrif á hann og byrja að ræða sína líðan. Saman þurfið þið að skoða ykkar samband og samskipti. Viljið þið halda áfram að vera saman og vinna í sambandinu eða eru þið komin á þann stað að vilja leita annarra leiða?

Hugsaðu um hvað þú vilt fyrir sjálfa þig næstu árin. Hvernig gæti lífið litið út ef þú fengir ást, hlýju og snertingu? Ef maki þinn er ekki tilbúinn að breyta neinu eða ræða málið, þá ertu ekki föst – þú hefur val. Þú átt skilið að finna gleði og nánd í lífinu, á þann hátt sem nærir þig. Það er mjög skiljanlegt að vilja meira.

Gangi ykkur vel <3

Allar greinar eftir Aldísi má finna á sama stað á Vísi.