Allt annað en sáttur með Frey

Áhugi Freys á Loga sem leikmanni er ekki nýr af nálinni og þegar að hann var þjálfari belgíska úrvalsdeildarfélagsins KV Kortrijk á síðasta ári fóru að heyrast sögur af mögulegum félagsskiptum Loga til Kortrijk.

Meðal annars var greint frá því að Strømsgodset hefði hafnað tilboði Kortrijk í Loga sem kvaðst á sínum tíma, í viðtali við Fótbolti.net, hafa verið spenntur fyrir því að vinna með Frey.

Áhugi Freys á Loga Tómassyni sem leikmanni hefur ekki kólnað nú þegar að hann er tekinn við liði í sömu deild og Logi spilar í. 

Strømsgodset og Brann mættust einmitt á dögunum og eftir leik var Freyr spurður út í Loga af blaðamanni VG.

„Hvort við höfum áhuga eða höfum gert tilboð í hann veit ég ekkert um. Það er hins vegar ekkert leyndarmál að ég hef reynt að næla í hann áður og eftir því sem ég best veit vill hann spila undir minni stjórn. En hér þurfa félögin tvö að ná samkomulagi,“ sagði Freyr við VG um Loga Tómasson.

Jørgen Isnes, þjálfari Strømsgodset, er ekki hrifinn af þessum ummælum og segir menn hjá Brann tala of mikið.

„Þeir tala of mikið um það í fjölmiðlum hversu hrifnir þeir eru af Loga og að þeir ætli sér að krækja í hann. Við höfum ekkert séð. Hann er leikmaður okkar og við er ánægðir með hann. Það skýtur skökku við þegar að þeir segjast vilja hann en gera svo ekkert í því,“ segir Jørgen Isnes í hlaðvarpinu Footballpodden.