Kallar Selenskí ein­ræðis­herra og varpar fram lygum

Færsla Trumps, sem hann skrifaði á TruthSocial, hans eigin samfélagsmiðil, inniheldur fjölmargar rangfærslur og áróður sem rekja má til Rússlands. 

Færsluna byrjar Trump á að biðja fólk um að hugsa sér að tiltölulega farsæll grínisti hafi fengið Bandaríkin til að verja „350 milljörðum dala“ í stríð sem Trump segir ómögulegt að vinna.

Þá lýgur hann því að Bandaríkin hafi varið 200 milljörðum meira í að aðstoða Úkraínu en Evrópa hafi gert og þar að auki sé öruggt að Evrópa muni einhvern veginn fá peninginn til baka. Bandaríkin muni ekkert fá til baka.

Trump lýgur því einnig að Selenskí hafi viðurkennt að helmingur af peningunum sem Úkraínumenn hafa fengið sé týndur, Selenskí neiti að halda kosningar og sé óvinsæll í Úkraínu.

Forsetinn bandaríski segir að kollegi sinn í Úkraínu hafi eingöngu verið góður í því að spila með Joe Biden, forvera hans í Hvíta húsinu.

„Einræðisherra án kosninga, Selenskí væri hollt að drífa sig eða hann mun ekki hafa ríki mikið lengur."

Trump sagði einnig að í millitíðinni væri hann að vinna að friði við Rússa og hann einn gæti gert það. Biden hafi ekki einu sinni reynt að semja um frið. Evrópu hafi mistekist það og ýjar að því að Selenskí vilji halda stríðinu áfram, vegna þess að hann græði á því.

„Ég elska Úkraínu, en Selenskí hefur staðið sig hræðilega. Landið hans er í rúst og MILLJÓNIR hafa dáið að óþörfu og þannig heldur það áfram.....“

JD Vance, varaforseti Trumps, deildi færslunni á X þar sem hann sagðist hafa viljað tryggja að hún færi ekki framhjá neinum.

Svar við ummælum Selenskís

Fréttakona á CNN hefur eftir embættismanni úr Hvíta húsinu að færsla Trumps sé svar við ummælum Selenskís frá því í morgun, þar sem hann bað Trump-liða um að virða sannleikann og forðast það að dreifa ósannindum og áróðri um innrás Rússa.

„Ég vildi hafa meiri sannleik hjá Trump-liðum,“ sagði Selenskí þegar hann ræddi við blaðamenn í Kænugarði í dag.

Hann sagði meðal annars að hann bæri mikla virðingu fyrir Trump, sem leiðtogi þjóðar sem Selenskí bæri einnig mikla virðingu fyrir og sem hefði ávallt staðið við bak Úkraínumanna, virtist sem Trump fengi mikið af röngum upplýsingum og áróðri frá Rússum.

Fjölmörg ósannindi

Selenskí er ekki einræðisherra. Hann var lýðræðislega kosinn í Úkraínu og nýtur stuðnings rúmlega helmings íbúa ríkisins, ef marka má kannanir. Ráðamenn í alræðisríkinu Rússlandi hafa ítrekað haldið því fram að hann sé umboðslaus þar sem hann er ekki búinn að halda nýjar kosningar, þar sem kjörtímabili hans ætti að vera lokið.

Stjórnarskrá Úkraínu heimilar ekki kosningar á stríðstímum og Úkraínumenn segja að það að halda kosningar yrði gífurlega erfitt með tilliti til átakanna, að stór hluti Úkraínu hafi verið hernuminn og að milljónir hafi flúið land.

Valerí Salúsjní, fyrrverandi yfirmaður herafla Úkraínu og núverandi sendiherra ríkisins í Bretlandi, er talinn líklegastur til að fara gegn Selenskí í nýjum kosningum, ákveði forsetinn að gefa aftur kost á sér. Salúsjní sagði í morgun að ótímabært væri að tala um framboð eða kosningar.

Fyrst þyrftu Úkraínumenn að tryggja áframhaldandi tilvist ríkisins.

Bandaríkjamenn hafa ekki varið 350 milljörðum í hernaðaraðstoð handa Úkraínu. Bandarískir þingmenn hafa samþykkt að verja um 174 milljörðum dala og hefur stórum hluta þeirra peninga verið varið í Bandaríkjunum.

Sérfræðingar telja Bandaríkin hafa varið um 119 milljörðum dala í aðstoð handa Úkraínumönnum. Evrópa hefur varið um 138 milljörðum.

Vita hvert peningarnir fara

Þá er ekki rétt að Selenski hafi viðurkennt að helmingurinn af hernaðaraðstoðinni sem Úkraínumenn hafi fengið frá Bandaríkjum sé týndur. Þessu hefur verið haldið fram eftir ummæli hans í viðtali í byrjun febrúar en ummælin hafa verið afbökuð, meðal annars af Elon Musk, nánum bandamanni Trumps.

Selenskí var að tala um, eins og fram kemur í greiningu PolitiFact, að miklu magni af hernaðaraðstoðinni sé varið í Bandaríkjunum og rati þess vegna ekki til Úkraínu.

Keith Kellogg, sérstakur erindreki Trumps gagnvart Úkraínu, sagði nýverið í viðtali að vel væri fylgst með aðstoðinni til Úkraínu og hvar fjármununum væri varið.

Hann sagði í viðtalinu að Bandaríkjamenn hefðu varið rúmum 174 milljörðum dala í hernaðaraðstoð handa Úkraínumönnum. Eftirlitsaðilar í bæði Úkraínu og Bandaríkjunum fylgdust með því að peningarnir færu þangað sem þeir ættu að fara.

Evrópa hefur aðstoðað meira

Trump hefur áður haldið því fram að Bandaríkjamenn hafi varið 350 milljörðum í aðstoð til Úkraínu. Hann sagði það einnig þann 12. febrúar og þá hélt hann því fram að Evrópa hefði eingöngu aðstoðað Úkraínu með hundrað milljörðum dala og það hefðu verið lán.

Sagði hann það í tengslum við samning sem hann vildi láta Selenskí skrifa undir, varðandi það að veita Bandaríkjunum aðgang að stórum hluta náttúruauðlinda Úkraínu, án nokkurskonar öryggistrygginga.

Í nýlegri grein Economist kemur fram að Evrópa hefur aðstoðað Úkraínumenn meira en Bandaríkjamenn og þar að auki hefur Evrópa heitið mun meiri aðstoð í framtíðinni en Bandaríkjamenn nánast engri.

Greining Economist byggir á gögnum þýsku hugveitunnar Kiel Institute en sjá má frekari upplýsingar á vef hennar.