Utan vallar: Hver ber á­byrgð á því hvað við erum glötuð?

Færeyingar opna nýja og glæsilega þjóðarhöll sína fyrir innanhússíþróttir á laugardaginn. Rúm tvö ár eru frá fyrstu skóflustungu og nú eiga Færeyjar, sem komust í fyrsta sinn inn á stórmót í handbolta í fyrra og þá bæði EM karla og kvenna, heimavöll sem stenst ítrustu kröfur.

Á meðan spila strákarnir og stelpurnar í okkar handboltalandsliðum heimaleiki í löngu úreltri Laugardalshöll, á milli þess sem liðin spila í glæsilegum höllum erlendis á hverju stórmótinu á fætur öðru sem frábærir kyndilberar Íslands.

Værum við kannski í betri málum ef við hefðum ekki slitið okkur frá Danmörku? Færeyska fótboltaliðið KÍ gat alla vega spilað heimaleiki sína um vetur í Færeyjum, á þjóðarleikvanginum Þórsvelli, þegar liðið sló í gegn og komst í riðlakeppni Sambandsdeildarinnar fyrir einu og hálfu ári.

Vandamálin með aðstöðumál á hæsta stigi íþrótta á Íslandi hafa verið svo mörg og sorgleg síðustu ár, en alveg gjörsamlega fyrirséð, og enginn vill bera á því ábyrgð.

Hver á annars að borga brúsann þegar Víkingar geta ekki spilað heimaleik á Íslandi heldur í Finnlandi, með þeim mikla tilkostnaði sem því fylgir? Og eitthvað kostar það fyrir KSÍ að neyðast til að spila erlendis, þó að eflaust hafi verið reynt að fara sem varfærnasta leið með því að spila á Spáni. Sá leikur er við Kósovó, þjóð með um 1,6 milljón íbúa sem hlaut viðurkenningu Íslendinga á sjálfstæði fyrir sautján árum. Kósovóar eru að sjálfsögðu með heimavöll sem stenst kröfur UEFA og spila heimaleik sinn í Pristina áður en þeir halda til Spánar í leikinn við Ísland.

Fjöldi fleiri dæma er um svona pínlegar aðstæður. Valsmenn urðu Evrópubikarmeistarar í handbolta í fyrra. Magnaður árangur. Þeir neyddust svo til að spila heimaleik í Evrópudeildinni í vetur í Hafnarfirði, vegna þess að aðeins einn löglegur dúkur er til á landinu og FH-ingar þurftu að nota hann sama kvöld.

Íslenska kvennalandsliðið mætti Serbum í fyrra, í umspilsleik á Kópavogsvelli. Hvenær var þessi mikilvægi leikur? Jú, klukkan 14:30 á þriðjudegi. Það var til þess að birtuskilyrði væru fullnægjandi á velli þar sem bæjaryfirvöld tímdu ekki að splæsa í nógu sterk flóðljós á sínum tíma (og ekki kom Laugardalsvöllur til greina í febrúarmánuði). Þessar aðstæður rímuðu engan veginn við mikilvægi leiksins en við þökkum Sveindísi Jane fyrir að hafa komið til bjargar seint í leiknum.

Ömurlegt aðgerðaleysi

Auðvitað vonar maður að fyrirætlanir um nýja þjóðarhöll gangi fljótt eftir og hún rísi tímanlega fyrir HM sem við lofuðum víst að halda eftir sex ár. Einhvern tímann stóð reyndar til að þessi höll myndi rísa 2025 en það vissu allir að það myndi ekki ganga eftir og maður þakkar bara fyrir ef manni endist aldur til að mæta á leik í henni.

Ný forysta KSÍ virðist hafa tekið skynsamleg skref varðandi Laugardalsvöll. Þar standa yfir framkvæmdir við (loksins) upphitaðan völl með blönduðu grasi sem vonandi væri þá hægt að nýta í þann fjölda mikilvægu leikja sem bíða íslenskra liða á vetrarmánuðum komandi ára.

Það er hins vegar svo skelfilega glatað og ömurlegt að skaðinn skuli vera skeður. Að þessi mál skuli ekki hafa verið græjuð fyrir löngu. Að þeir sem gátu gert eitthvað hafi ekki gert neitt. Alþingismennirnir okkar, sveitarstjórnarfólk, íþróttaforystan, fjölmiðlar, almenningur – það má kenna öllum um. Það eina sem ég veit er að íþróttafólkið okkar stendur sig margfalt betur og á einfaldlega mikið betra skilið.