Um­boðs­maður vill út­skýringar á svörum for­seta­em­bættisins

Þetta kemur fram á vef umboðsmanns, en þar segir að á meðal þess sem spurt sé um sé hvaða reglur gildi um meðferð beiðna um upplýsingar um dagskrá forseta.

Rúv fjallaði í gær um svör forsetaskrifstofunnar við fyrirspurnum sem vörðuðu minningarathöfn um helförina í Auschwitz í lok janúar. Forsetaskrifstofan hafi veitt óskýr svör um þetta.

Í síðustu viku hafi verið talað um að minningarathöfnin hentaði ekki dagskrá forsetans, og að ekki væri hægt að afhenda dagskrá hans. Í kjölfarið hafi fengist þau svör að þegar minningarathöfnin hafi verið haldin hafi forsetinn verið heima á Bessastöðum. Samkvæmt stjórnartíðindum hafi hún verið erlendis milli 17. janúar og komið heim 27. janúar, sama dag og minningarathöfnin fór fram.

Rúv hefur síðan fengið samskipti utanríkisráðuneytisins við forsetaembættið, en þar segir að 4. desember hafi komið fram að forsetinn hefði ekki tök á að sækja viðburðinn vegna einkaferðar forsetahjónanna.

Í bréfi umboðsmanns til skrifstofu forseta segir að óskað sé eftir upplýsingum um reglur sem varða upplýsingagjöf, líkt og um dagskrá forseta. Þá er óskað eftir því hvaða sjónarmið lágu til grundvallar þegar Rúv var synjað um upplýsingar um dagskránna.

„Er þá sérstaklega haft í huga að ekki var beðið um upplýsingarnar fyrir fram heldur eftir á,“ segir í bréfi umboðsmanns.