Hundruðum svekktra tónleikagesta vísað frá Hvalasafninu

Sjónarvottur lýsir því að hafa komið að lögreglumönnum og luktum dyrum með miða sem á stóð að frekari upplýsinga um aflýsinguna væri að vænta á morgun. Fjölmargir fóru svekktir af Grandanum en ekkert hafði verið gefið út um að viðburðinum yrði aflýst fyrr en á síðustu stundu.

Tónleikarnir áttu að hefjast klukkan níu í kvöld. Vonast er til þess að hægt verði að halda tónleikana á morgun en aflýsingin stafar að sögn viðburðarhaldara af vandræðum með viðburðarleyfisveitingu.

Kerfisbilun lögvalds

Framleiðslufyrirtækið LP Events stóð að tónleikunum og þeir birtu færslu á síðu sinni á Instagram þar sem þeir greindu frá aflýsingunni. Þeir kenna „kerfisbilun lögvalds“ um.

„Óviðráðanlegar aðstæður ollu því að viðburður kvöldsins gat ekki farið fram. Kerfisbilun lögvalds sem snýr að húsnæðinu og gífurleg sprengja í aðsókn gerði það að verkum að ekki var hægt að taka hurðina úr lás,“ segja þeir.

Þeir segjast þykja það miður að þurfa að vísa fólki frá og stefna að því að halda tónleikana annað kvöld.

Sögusagnir um heimsfrægan leynigest

Það vakti athygli í gær þegar frambjóðandi Samfylkingarinnar rakst á góðan vin tvíeykisins í Melabúðinni, nánar tiltekið Fred again sem er einn heitasti plötusnúður í heimi um þessar mundir. Í viðburðarlýsingunni kom fram að ásamt tvíeykisins myndu koma fram sérlegir vinir þeirra. Margir leiddu af því að þar hafi verið um Fred again að ræða þó að það liggi alls ekki fyrir.

Joy Anonymous og Fred again hafa oft sameinað kraftað sína og gefið út nokkur lög. Samkvæmt upplýsingum frá skipuleggjendum eru þeir félagar í Joy Anonymous miklir hvalavinir og var því ákveðið að halda tónleikana þar.

Allur ágóði af tónleikunum mun renna til góðgerðamála, nánar tiltekið til hvalavinasamtakanna Icelandic Orca Project. Miðar fóru í sölu í gær og seldist upp á skotstundu. Það urðu því ansi margir svekktir þegar tónleikunum var aflýst.