Fjölgar hratt í ríkis­stjórn Trumps

Fregnir bárust af því í gærkvöldi að Trump ætlaði að fá Marco Rubio, öldungadeildarþingmann frá Flórída, til að verða utanríkisráðherra sinn. Um tíma kom Rubio til greina sem varaforsetaefni Trumps, samkvæmt frétt New York Times.

Trump er ekki búinn að taka lokaákvörðun en Rubio þykir líklegur til að fá embættið. Hann var fyrst kjörinn á þing árið 2010 og er þekktur fyrir harða afstöðu sína gagnvart ríkjum eins og Íran, Kína, Venesúela og Kúbu.

Rubio hefur einnig sagt að Úkraínumenn geti ekki búist við að ná öllu sínu landsvæði til baka frá Rússum og hefur greitt atkvæði gegn hernaðaraðstoð við Úkraínu.

Þá tilkynnti Trump í gær að Michael Waltz, þingmaður frá Flórída, yrði þjóðaröryggisráðgjafi hans. Waltz er fyrrverandi sérsveitarmaður í bandaríska hernum og starfaði á árum áður fyrir Dick Cheney, fyrrverandi varaforseta Bandaríkjanna.

Fyrr í gær hafði Trump tilkynnt að þingkonan Elise Stefanik yrði sendiherra hans gagnvart Sameinuðu þjóðunum og að Tom Homan yrði svokallaður „landamærakeisari“.

Trump tilkynnti eina skipun til viðbótar í gær þegar hann opinberaði að Lee Zeldin, fyrrverandi þingmaður í fulltrúadeildinni frá New York, myndi leiða Umhverfisstofnun Bandaríkjanna í ríkisstjórn hans.

Búist er við því að Trump muni skera verulega niður hjá stofnuninni og fækka reglugerðum verulega, eins og hann hefur sagst ætla að gera. Er þar um að ræða reglugerðir sem ætlað er að sporna gegn veðurfarsbreytingum og ýta undir notkun rafmagnsbíla.

Í tilkynningu sinni varðandi Zeldin sagði Trump að með því að fella niður reglulgerðir um umhverfisvernd yrðu bandarísk fyrirtæki frelsuð úr fjötrum hins opinbera og á sama tíma myndi Zeldin tryggja að Bandaríkjamenn gætu státað sig af hreinasta vatni og lofti heimsins.

Þá hefur Trump einnig tilkynnt að Stephen Miller mun vera sérstakur ráðgjafi hans í Hvíta húsinu, eða aðstoðarstarfsmannastjóri. Miller hefur lengi starfað fyrir Trump og var ráðgjafi hans í fyrstu forsetatíð hans og er hann þekktur fyrir harða afstöðu sína gegn innflytjendum.

Minnkar lítinn meirihluta enn frekar

Búist er við því að Repúblikanar muni ná mjög tæpum meirihluta í fulltrúadeild Bandaríkjaþings. Þá stefnir í að Trump ætli að fá að minnsta kosti tvo þingmenn í ríkisstjórn sína, sem mun væntanlega gera Mike Johnson, leiðtoga þingflokks Repúblikana í fulltrúadeildinni, töluvert erfiðara að koma frumvörpum í gegnum þingið fyrstu daga þess.

Halda þarf sérstakar kosningar í kjördæmum bæði Stefanik og Waltz, til að fylla sæti þeirra á nýjan leik.

Johnson mun þó líklega fá mikla hjálp frá Trump, sem talinn er ætla að þrýsta verulega á þingmenn til að greiða atkvæði í takt við áherslur hans.

Á fyrsta kjörtímabili hans deildi Trump reglulega við fólk í ríkisstjórn hans og reyndu margir að komast hjá því að framfylgja skipunum hans og hugdettum. John Kelly, fyrrverandi starfsmannastjóri hans, hefur lýst Trump sem fasista, aðrir úr ríkisstjórn hans hafa sagt hann heimskan og svo má lengi telja.

Fjölmargir sem sátu í fyrstu ríkisstjórn Trumps lýstu því yfir fyrir kosningarnar að hann væri óhæfur til að vera forseti aftur.

Sjá einnig: Trump velur starfs­manna­stjóra úr innstu röðum

Þá hefur Trump gagnrýnt þessa menn harðlega og jafnvel lagt til að Mark Milley, fyrrverandi formaður herforingjaráðs Bandaríkjanna, ætti að vera tekinn af lífi fyrir landráð.

Að þessu sinni virðist Trump leggja mun meiri áherslu á að umkringja sig fólki sem hann veit að er honum hliðhollt og er líklegt til að framfylgja skipunum hans án mótmæla.