Tottenham fagnaði sigri í þriðja leik sínum í röð í Evrópudeildinni þegar liðið vann nauman 1-0 sigur á hollenska liðinu AZ Alkmaar.
Tottenham hefur fullt hús eins og Lazio frá Ítalíu og Anderlecht frá Belgíu sem unnu líka 1-0 sigra í kvöld.
Eina mark Tottenham skoraði Brasilíumaðurinn Richarlison úr vítaspyrnu á 53. mínútu. Svíinn Lucas Bergvall fiskaði vítið.
Leikmenn Tottenham rifust reyndar um það hver tæki vítið en Richarlison hafði þar betur gegn James Maddison.
Tottenham liðið endaði leikinn ellefu á móti tíu eftir að David Møller Wolfe fékk sitt annað gula spjald.
