Ein­kunnir stór­leiksins á Hlíðar­enda: Telma og vörn Blika bar af

Ekkert mark var skorað á Hlíðarenda og var það öruggri frammistöðu Telmu Ívarsdóttur að þakka í marki Blika sem og varnarlínu liðsins. Dugði það til að halda markinu hreinu og tryggja að titillinn endaði í Kópavogi að þessu sinni. Hér að neðan má sjá einkunnir íþróttadeildar Vísis frá Hlíðarenda. 

Breiðablik 

Telma Ívarsdóttir - 8

Var öryggið uppmálað í markinu allan tímann og greip vel inn í þegar á þurfti að halda. Í pressu Valskvenna undir lokin sýndi Telma styrk sinn og veitti Blikavörninni aukinn kraft

Barbára Sól Gísladóttir - 7

Líkt og öll vörn Blika var Barbára öflug í hægri bakverðinum og spilaði vel varnarlega

Ásta Eir Árnadóttir - 8

Leiðtogi Breiðabliks á vellinum og steig ekki feilspor í leiknum. Stýrði vörninni eins og herforingi og sýndi mikilvægi sitt í hvívetna.

Elín Helena Karlsdóttir - 7

Spilaði vel í vörn Breiðabliks og hélt öflugum sóknarmönnum Vals í skefjum ásamt stöllum sínum í vörninni.

Kristín Dís Árnadóttir - 7

Virkaði aðeins óörugg í byrjun en vann á þegar leið á leikinn. Fín frammistaða í heildina.

Heiða Ragney Viðarsdóttir - 8

Spilaði feykilega vel á miðri miðjunni og braut ófáar sóknir Valsliðsins á bak aftur. Kom boltanum oftast í fætur samherja og var afar öflug í sterku Blikaliði.

Andrea Rut Bjarnadóttir - 6

Var dugleg og vann mikilvæga vinnu á miðjunni. Komst ekki alveg í takt við leikinn sóknarlega og var tekin af velli á 77. mínútu

Samantha Smith - 6

Hefur komið af gríðarlegum krafti í lið Breiðabliks og dúndrað inn mörkum síðan hún kom til liðsins í ágúst. Var ógnandi í fyrri hálfleik í dag en var annars daufari en vanalega.

Agla María Albertsdóttir - 7

Var afar dugleg og hljóp á við tvo. Fékk gott færi í seinni hálfleiknum en skaut framhjá markinu.

Vigdís Lilja Kristjánsdóttir - 6

Var dugleg og hljóp mikið. Gekk á köflum brösuglega að koma boltanum á samherja en vann mikilvæga vinnu í framlínunni.

Katrín Ásbjörnsdóttir - 6

Fékk besta færi Blika þegar hún átti skalla sem bjargað var á marklínu. Fór meidd af velli í síðari hálfleik og virtust meiðslin alvarleg. Tók þátt í fagnarlátum Blika á öðrum fætinum og verður vonandi komin aftur í slaginn sem fyrst.

Varamenn Breiðabliks

• Hrafnhildur Ása Halldórsdóttir (kom inn á 77. mínútu) - spilaði of lítið til að fá einkunn
• Birta Georgsdóttir (kom inn á 77. mínútu) - spilaði of lítið til að fá einkunn
• Margrét Lea Gísladóttir (kom inn á 96. mínútu) - spilaði of lítið til að fá einkunn

Valur

Fanney Inga Birkisdóttir - 7

Spilaði vel og var traust í markinu. Greip inn í þegar á þurfti að halda og heildarframmistaðan fín

Hailey Whitaker - 6

Spilaði ágætlega í hægri bakverðinum og tók töluverðan þátt í sóknarleiknum. Var traust varnarlega en sóknarlega kom lítið út úr því sem var reynt.

Lillý Rut Hlynsdóttir - 7

Ekkert út á frammistöðu hennar að setja. Myndar feykisterkt miðvarðapar með Natasha Anasi.

Natasha Anasi - 7

Landsliðsmiðvörðurinn átti fínan leik og Blikar sköpuðu sér fá opin færi. Var hent í framlínuna undir lokin en það skilaði litlu.

Anna Rakel Pétursdóttir - 7

Spilaði ágætlega í vinstri bakverðinum og átti góðar hornspyrnur sem sköpuðu usla.

Ragnheiður Þórunn Jónsdóttir - 6

Byrjaði á vinstri kantinum en færði sig svo yfir á þann hægri. Komst ekki nægilega vel í takt við leikinn en fékk ágætt færi í fyrri hálfleik þegar hún skaut hátt yfir markið.

Katie Cousins - 7

Var vafi á því hvort hún yrði leikfær. Spilaði allan leikinn og sýndi að hún er tæknilega afar góð. Dreifði spilinu ágætlega en sóknarleikur Vals var ekki nægilega beittur í dag.

Berglind Rós Ágústsdóttir - 6

Lykilmaður á miðjunni en líkt og aðrir leikmenn Vals tókst henni ekki nægilega vel að skapa færi í sókninni.

Guðrún Elísabet Björgvinsdóttir - 6

Komst ekki nægilega vel í takt við leikinn eftir gott tímabil í sumar. Var tekin af velli á 68. mínútu

Fanndís Friðriksdóttir - 6

Var töluvert í boltanum og en leið fyrir að sóknarleikur Vals var ekki nægilega góður. Fékk besta færi Vals á lokasekúndunum en skaut framhjá úr góðu færi.

Jasmín Erla Ingadóttir - 6

Komst ekki í takt við leikinn og fékk fá færi.

Varamenn Vals

• Ísabella Sara Tryggvadóttir (kom inn á 69. mínútu) - 7 Kom inn af ágætum krafti og virkaði frísk. Komst í ágætar stöður sem urðu þó ekki að nægilega góðum færum.
• Berglind Björg Þorvaldsdótrir (kom inn á 69. mínútu) - 6 Var lítið í boltanum og setti lítinn svip á leikinn.