Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Ég elska að fylgjast með nýjum straumum og stefnum þótt ég sé sjálfri mér trú um hvað fer mér og með minn eigin stíl. Mér finnst svo skemmtilegt að fylgjast með þessari eilífu hringrás, þar sem hlutirnir koma og fara úr tísku.
Hver er uppáhalds flíkin þín og af hverju?
Uppáhalds flíkin mín þessa stundina er dúnúlpa sem ég fékk í 38 Þrep, einstaklega falleg og stílhrein flík sem verður alltaf tímalaus.
Eyðirðu miklum tíma í að velja föt hverju sinni?
Ég hef alltaf haft gaman af fallegum flíkum og reyni að vanda valið hverju sinni. Ég er ekki þekkt fyrir að hafa rólegt í kringum mig og er vanalega á smá hraðferð, en kvöldin nýtast í að skoða föt og velja saman.
Hvernig myndirðu lýsa stílnum þínum?
Stíllinn minn er persónulegur, einfaldur og ekki sérlega litaglaður þó svo að ég sé að eðlisfari frekar glaðlynd.
Hefur stíllinn þinn breyst mikið í gegnum tíðina og hvernig þá?
Stíllinn hefur ekki breyst mikið en ég finn að ég aðhyllist mun meira haustlínuna þegar að það kemur að tísku nýjungum. Ég er íhaldssöm á haustlínurnar og þær höfða mun sterkara til mín en aðrar.
Nýturðu þess að klæða þig upp?
Þegar að ég hef nægan tíma nýt ég þess að klæða mig upp en eftir að ég eignaðist Kötu dóttur mína finnst mér skemmtilegra að kaupa velja för á hana heldur en sjálfa mig, sem eflaust flestar mæður tengja við.
Hvaðan sækirðu innblástur í tískunni?
Ítalskir straumar í tísku og stefnu hafa alltaf haft mikil áhrif á mig. Held stundum að ég sé meiri Ítali en Íslendingur í mér.
Annars á ég líka smekklegar vinkonur sem veita mér innblástur alla daga, hvort sem við kemur klæðaburði eða stíl.
Ertu með einhver boð og bönn þegar það kemur að klæðaburði?
Er frekar íhaldssöm og fastheldin á stíl og mætti alveg stundum gleyma mínimalismanum þó að hann sé mér mjög kær.
Hver er eftirminnilegasta flík sem þú hefur klæðst og af hverju?
Erfitt að velja eina ákveðna flík en mamma gaf mér einu sinni vintage Burberry frakka sem ég held að standi mest upp úr.
Býrðu yfir einhverju góðu ráði þegar það kemur að tísku?
Mitt ráð er vönduð efni skila alltaf sínu, hvort sem um er að ræða fatnað eða húsmuni.
Hér má fylgjast með Stellu á samfélagsmiðlinum Instagram.
