Ráðu­neytið hundsi í­trekaðar til­raunir sjálf­boða­liðanna til sam­skipta

Hópur sjálfboðaliða á vegum Solaris hefur undanfarnar rúmar tvær vikur unnið að því að koma Palestínumönnum sem fengið hafa dvalarleyfi á grundvelli fjölskyldusameiningar út af Gasa. Þegar er búið að koma tveimur fjölskyldum út og til Íslands og vinna stendur yfir að koma enn fleirum út.

„Þessi vinna hefur núna skilað þeim árangri að tólf einstaklingar eru á leiðinni yfir landamærin næstu daga,“ segir Sema Erla Serdar, stofnandi Solaris, sem er stödd í Kaíró. 

„Þessi hópur samanstendur af veikum og særðum einstaklingum sem eru lífshættu á hverjum degi, til viðbótar við þá hættu sem stafar af ítrekuðum árásum Ísraelshers. Þetta eru meðal annars sautján ára drengur, sem er illa særður eftir árásir. Þetta er ung stúlka, sem er með sjúkdóm og þarf nauðsynleg lyf við en getur ekki nálgast. Þetta eru líka tvö ungbörn, undir eins árs, og mæður þeirra, sem eru mjög vannærð. Svo er það einn fullorðinn maður sem er mjög veikur af krabbameini.“

Átakanlegar aðstæður í Kaíró

Ísraelsher hefur undanfarna daga framið hverja árásina á borgina Rafah, við landamærin að Egyptalandi. Meirihluti íbúa Gasastrandarinnar, rúm ein milljón, heldur nú til í borginni, sem áður hafði um 300 þúsund íbúa. Sema segir mikla spennu á landamærunum og í Egyptalandi vegna tíðra árása á borgina.

„Staðan í borginni er auðvitað hræðileg og hún heldur áfram að versna með hverjum degi. Við erum að horfa á þjóðarmorð í beinni útsendingu. Örvæntingin er mjög mikil hjá fólkinu þar og fjölskyldum þeirra, sem hafa fengið samþykkta fjölskyldusameiningu en fá ekki fjölskyldu sína út af Gasa. Við erum í kappi við tímann, það er það sem við erum að gera,“ segir Sema. 

„Aðstæðurnar hérna í Kaíró eru líka mjög erfiðar, þær eru átakanlegar. Þetta er mjög erfitt og sorglegt þó þetta sé ekki jafn flókið og íslensk yfirvöld vilja meina. Það er mikil örvænting í loftinu.“

Ekkert heyrt frá ráðuneytinu

Þrír íslenskir diplómatar á vegum Utanríkisráðuneytisins hédu út til Kaíró um liðnahelgi til að eiga fund með fulltrúum egypskra stjórnvalda. Sjálfboðaliðarnir hafa enn ekkert frá þeim heyrt.

„Hér erum við að vinna skylduverk íslenskra stjórnvalda og ég vil lýsa yfir miklum vonbrigðum með það að við höfum ekki komist í neitt samband - hvorki við utanríkisráðuneytið né fulltrúa þess hér í Kaíró - þrátt fyrir ítrekaðar tilraunir til þess,“ segir Sema Erla. 

„Við höfum ítrekað sent beiðni til utanríkisráðuneytisins að komast í samband við þessa einstaklinga svo við séum ekki að vinna sama verkefni á tveimur stöðum. Og til þess að sjá hvað þau eru raunverulega að gera hér. Hér skiptir ekki máli að tala meira, hér skiptir máli að láta verkin tala.“