Innlent

Meiri­hluti fundar­manna vill falla frá sam­einingu

Árni Sæberg skrifar
Svo virðist sem ekki sé mikil eftirvænting innan HA eftir sameiningu við Háskólann á Bifröst.
Svo virðist sem ekki sé mikil eftirvænting innan HA eftir sameiningu við Háskólann á Bifröst. Háskólinn á Akureyri

Talsverður meirihluti fundarmanna á svokölluðum háskólafundi í Háskólanum á Akureyri greiddi atkvæði með ályktun um að fallið yrði frá fyrirhugaðri sameiningu Háskólans á Akureyri og Háskólans á Bifröst.

Frá þessu greinir Akureyri.net. Í frétt bæjarmiðilsins segir að tveir af hverjum þremur fundarmönnum hafi greitt atkvæði með tillögunni, sem lögð var fram af þrettán akademískum starfsmönnum Félagsvísinda- og Viðskiptadeilda.

Áslaug Arna Sigurbjörnsdóttir, ráðherra háskólamála, greindi frá því á dögunum að Háskólaráð háskólanna á Akureyri og Bifröst hefði samþykkt að hefja sameiningarviðræður. Sameinaður skólinn yrði næststærsti háskóli landsins.

Í frétt Akureyrar.net segir að háskólafundur sé samráðsvettvangur fulltrúa yfirstjórnar Háskólans á Akureyri, fræðasviða hans, fulltrúa starfsmanna við stjórnsýslu skólans og fulltrúa nemenda og kennara.

Ályktun starfsmannanna þrettán hafi verið samþykkt af 25 fundarmönnum en þrettán hafi greitt atkvæði gegn henni.

Háskólar Skóla - og menntamál Akureyri

Mest lesið


Fleiri fréttir

Sjá meira


×

Mest lesið