Á fundum breiðfylkingar stéttarfélaga innan ASÍ og Samtaka atvinnulífsins er bæði tekist á um krónutölu launahækkana á þessu og næstu árum, þá aðferðafræði sem samningarnir eigi að byggja á sem og forsenduákvæði. Fundi þeirra lauk upp úr klukkan fimm í dag.
Breiðfylkingin og samtök atvinnulífsins mættu til fundar í Karphúsinu klukkan ellefu í morgun. En fundi lauk upp úr klukkan fimm. Sólveig Anna Jónsdóttir formaður Eflingar segir málunum hafa þokast lítið áfram.
„Við ætlum að hittast aftur á morgun klukkan eitt og halda þessu langdregna samtali áfram,“ sagði formaður Eflingar.
Eitt að því sem tekist er á um er hvað samið verði til margra ára.
„Við lögðum upp með það í upphafi að þetta yrði til að minnsta kosti þriggja ára. Samtök atvinnulífsins hafa viljað gera lengri samning, eða til fimm ára. Við erum til viðræðu um það en þá þurfa hlutirnir að raðast upp með þeim hætti sem við getum fellt okkur við,“ segir Sólveig Anna.
Sigríður Margrét Oddsdóttir framkvæmdastjóri Samtaka atvinnulífsins segir mikilvægt að tryggja stöðugleika á vinnumarkaðnum.
„Það sem skiptir kannski mestu máli er að við erum með þessa sameiginlegu sýn á þessi markmið sem við viljum ná. Það er að segja það þrá allir efnahagslegan stöðugleika. Verðbólgan minnki og þar með geti vextir lækkað. Þannig að við erum bara að vanda okkur mjög við þetta verkefni,“ segir Sigríður Margrét.
Vegna ummæla formanns Sjálfstæðisflokksins á Ríkissjónvarpinu í gær um að verkalýðshreyfingin gæti ekki vænst þess að fá öllum sínum kröfum framgengt vegna kostnaðar ríkisins í tengslum við hamfarirnar í Grindavík, segir Sigríður Margrét hug allra við samningaborðið vera með Grindvíkingum sem nú stæðu frammi fyrir nýjum raunveruleika. Þá er fyrsti vaxtaákvörðunardagur Seðlabankans á þessu ári framundan eftir hálfan mánuð.
„Það sem skiptir máli er að við náum að gera langtíma, skynsamlega kjarasamninga. Til þess bæði að tryggja það að verðbólga geti minnkað en eins líka til að skapa það umhverfi að verðbólguvæntingar minnki,“ segir framkvæmdastjóri SA
Sólveig Anna segir breiðfylkinguna mjög meðvitaða um þá atburðarás sem hún væri stödd í. Það væri síðan undarlegt að formaður Sjálfstæðisflokksins stilli atburðunum í Grindavík upp með kjaraviðræðunum. Að sjálfsögðu stæði verkalýðshreyfingin með Grindvíkingum.
Kjarasamningarnir væru hins vegar risavaxið verkefni sem næði til 115 þúsund manns á vinnumarkaði eða sjötíu og þriggja prósenta vinnumarkaðarins.
„Þannig að láta eins og það sé eitthvað verkefni sem hægt sé að ýta til hliðar, láta eins og það sé verkefni sem stjórnvöld horft á og ekki axlað ábyrgðgagnvart. Vegna þess að aðrir, vissulega alvarlegir atburðir hafi átt sér stað. Slík nálgun gengur augljóslega ekki upp þegar viðskoðum þetta. Þær tillögur sem við förum fram með eru góðar. Þær eru réttmætar. Þær snúa að því að endurreisa hér tilfærslukerfin, koma þeim eins og þau voru árið2013. Þetta eru auðvitaðumbætur sem gagnast öllum,“ segir Sólveig Anna Jónsdóttir.
