Erlent

Tólf ríki hóta Hútum hefndar­að­gerðum fyrir á­rásirnar á Rauða hafi

Hólmfríður Gísladóttir skrifar
Hútar ræna flutningaskipi á Rauða hafi.
Hútar ræna flutningaskipi á Rauða hafi. Getty/Anadolu

Bandaríkin, Bretland og tíu önnur ríki hafa varað Húta við því að það muni hafa alvarlegar afleiðngar í för með sér ef þeir láta ekki af árásum sínum á flutningaskip á Rauða hafi.

Uppreisnarmenn Húta í Jemen, sem njóta stuðnings Íran, hafa lýst yfir stuðningi við Hamas í yfirstandandi átökum á Gasa og gert fleiri en 20 árásir á flutningaskip á Rauða hafi frá því í nóvember síðastliðnum.

Hútar hafa notast við eldflaugar, dróna, þyrlur og hraðskreiða báta í árásum sínum og haldið því ranglega fram að um hafi verið að ræða skip tengd Ísrael. 

Bandaríkjamenn og Bretar hafa hingað til skotið niður nokkrar af eldflaugum Húta en ekki gert árásir á skotmörk í Jemen, enn sem komið er. Það gæti hins vegar breyst.

Áðurnefnd yfirlýsing til Húta var undirrituð af Ástralíu, Bahrain, Belgíu, Kanada, Danmörku, Þýskalandi, Ítalíu, Japan, Hollandi og Nýja-Sjálandi, auk Bandaríkjanna og Bretlands.

Árásir Húta eru sagðar ólögmætar og óásættanlegar. Þá er því hótað að ef þær halda áfram muni Hútar þurfa að sæta afleiðingum þess, mögulega hernaðaríhlutun.

Um 20 prósent af skipaumferð um Rauða haf er sagt hafa verið beint annað og áhyggjur eru uppi um að árásirnar muni hafa áhrif á birgðalínur og olíuverð.

Jemen Bandaríkin Bretland Átök í Ísrael og Palestínu
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið