Metró maðurinn orðinn mið­aldra

Metró maðurinn leyfði sér meira en bara ljósabekki og strípur til að hressa upp á útlitið. Hann notaði líka snyrtivörur, krem og hárvörur sem ekki var algengt á þeim tíma. 

En nú er Metró maðurinn orðinn miðaldra og neyðist til að takast á við hækkandi kollvik, lélegan hvirfil, bauga og hrukkur. Baldur Rafn gengst heilshugar við því að vera ein helsta fyrirmynd Metró mannsins en hann nýjasti gestur Einars Bárðarsonar í hlaðvarpsþættinum Einmitt.

Í þættinum fara þeir um víðan völl og vopna metró manninn inn í miðaldra slaginn.

Lærði hárgreiðslu undir leiðsögn goðsagnar

Baldur lauk sveinsprófi í hársnyrtiiðn á samningi hjá goðsögninni Karli Berndsen. Baldur og Guðmundur félagi hans opnuðu stofuna Mojo á Vegamótastíg og í framhaldi af því keyptu þeir stofuna Monroe og sameinuðu þær undir nafninu Mojo Monroe. 

Baldur breytti svo til í lok áratugarins og í framhaldi af því stofnuðu hann og konan hans Sigrún Bender heildsöluna Bpro. Þau eiga saman þrjú börn, Sigrún er viðskiptafræðingur og fjármálastjóri Bpro og flugstjóri hjá Icelandair svo það er nóg að gera á heimilinu.

Verkaskipting sem virkar heima

Í þættinum fjallar Baldur meðal annars um skipulag hjónanna. Þar er tekið tilliti til álagstíma þeirra beggja utan heimilisins og þau skipta álagi heimilisþáttanna á milli sín. 

„Í byrjun hvers mánaðar er skipulagslistinn settur upp í kerfið og miðast þá við flugvaktir Sigrúnar og svo er annað skipulagt utan um það. Síðan er mánuðurinn endurskoðaður í hverri viku og hvernig gengur í lok hverrar viku.“ 

Stýrðu metró væðingunni

Þeir félagar ræða einnig hárgreiðslu- og snyrtivöru bransann. Baldur er mikill markaðsmaður og útskýrir hvernig samstarfsfólk hans markaðssettu fyrst hugtakið Metró maður af krafti hérna á Íslandi. 

„Metró menn voru ungir karlmenn um aldamótin sem leyfðu sér að hugsa meira um útlitið heldur en áður þekktist hjá karlmönnum. Þeir fóru ekki bara í ljós og strípur og versluðu flott föt heldur fóru þeir að prófa sig áfram með ýmsar snyrtivörur og fleiri en eina tegund af geli.“

Áskoranir miðaldra metró manna

Núna eru metró mennirnir flestir orðnir miðaldra og því fylgja nýjar áskoranir. Hrukkur, há kollvik og skallar. Það síðastnefnda er áratuga ef ekki ár hundruða gömul áskorun karlmanna. Í þættinum fer Baldur ýmsar nýjar tækninýjungar og meðferðir í þeim efnum en víða erlendis er verið að þróa og keyra aðferðir sem hafa reynst mjög vel. 

„Þær aðgerðir eru mikil inngrip en þar eru hár úr virkum svæðum höfuðsins færð handvirkt á svæði þar sem hár er farið að þynnast.“

Baldur lýsir þessum aðgerðum og öðrum sem eru minni inngrip og kosti þeirra og galla.

Þáttinn í heild sinni má hlusta á hér fyrir neðan.