Dönsku meistararnir í karla­fót­boltanum loksins að stofna kvenna­lið

Það hefur aftur á móti verið agalegt kynjamisrétti í félaginu því hingað til hefur FCK ekki viljað sjá konur spila undir merkjum félagsins. Það er sem betur fer að breytast.

Forráðamenn félagsins hafa nú gefið það út FCK verði með kvennalið frá og með 2024-25 tímabilinu.

Það er reyndar ekki enn orðið opinbert hvernig FCK ætlar að haga sínum málum með sitt kvennalið, hvort félagið ætli að taka yfir annað kvennalið í nágrenninu eða fara alveg á byrjunarreit.

„Við vitum það að kvennalið okkar mun stíga inn á völlinn frá og með næsta tímabili,“ sagði Rebecca Steele, verkefnisstjóri kvennaliðs FCK, í viðtali við TV 2 Sport.

„Það eru nokkrar leiðir í boði. Við þurfum að taka mjög stóra ákvörðun um það hvernig við ætlum að byggja upp kvennaliðið okkar,“ sagði Steele. Það hefur verið umræða um að FCK taki yfir kvennalið Sundby Boldklub, sem er eitt af samstarfsfélögum FCK en hvort það verði lausnin á enn eftir að koma fram í dagsljósið.

Það fylgir auðvitað sögunni að Knattspyrnusamband Evrópu, UEFA, hefur sett þá kröfu á félög sem vilja taka þátt í Evrópukeppnum karla frá og með 2024-25 tímabilinu að þau þurfa þá að tefla fram kvennaliði.