Anníe Mist: Konur eru ekki litlir karlar

Það eru margir vöruframleiðendur í CrossFit heiminum sem vilja tengja sig við nafn íslensku goðsagnarinnar en eftir eigin rannsóknir og miklar pælingar þá vildi hún bara semja við einn framleiðanda af fæðubótarefnum.

Anníe Mist fagnar nýjum samningi sem hún segir sé fullkominn félagi fyrir sig í færslu á samfélagsmiðlum.

„Um leið og þú skoðar betur þennan framleiðanda þá sérðu af hverju ég valdi hann. Ég hef haft mikinn áhuga á því að fræðast um og kenna sjálfri mér hvernig ég sé best að neita fæðubótarefna í kringum tíðahringinn. Ekki bara fyrir árangur heldur einnig fyrir góða heilsu,“ skrifaði Anníe Mist.

Gera rannsóknir fyrir konur

„Þetta fyrirtæki er gera nauðsynlegar rannsóknir og sinna fræðslu, ekki síst fyrir konur. Konur eru ekki litlir karlar. Ég er svo stolt að vera komin í samstarf með þessum framleiðanda og get ekki beðið eftir því að við vinnum saman,“ skrifaði Anníe Mist.

Það er ljóst að þú kemur ekki að tómum kofanum hjá Anníe Mist hvað varðar fæðubótarefni en hún hefur mikla reynslu af því að finna út hvað reynist henni vel og hvað ekki. Anníe keppti fyrst á heimsleikunum fyrir fjórtán árum og hefur á þessum tíma fylgst afar vel með því sem hún lætur ofan í sig.

Nýr samningur hennar vakti athygli Morning Chalk Up miðilsins og ekki síst ákveðni Anníe og vilja bara samning við einn aðila.

„Ég er einstaklingur sem tek mikið af fæðubótarefnum. Miðað við alla pælingarnar sem fara í það hvað ég borða, þá skiptir það líka miklu máli að velta fyrir sér hvaða fæðubótarefni séu best fyrir þig,“ sagði Anníe Mist Þórisdóttir í grein Morning Chalk Up.

Samningslaus í heilt ár

„Ég hef alltaf hugsað mikið um þetta en sérstaklega eftir að ég varð ófrísk af Freyju. Ég velti fyrir mér hvað væri í lagi að taka og hvað ég ætti að taka,“ sagði Anníe Mist.

„Ég hafði verið samningslaus í heilt ár þegar kom að fæðubótarefnum en ég hafði verið að nota Momentous. Ég nýt þeirra forréttinda að ég get valið og ég sagði umboðsmanninum mínum að ég væri til í að vinna með Momentous en engum öðrum,“ sagði Anníe Mist.

Anníe Mist keppir nú á sínum þrettándu heimsleikum þar af í tólfta sinn í einstaklingskeppninni. Hún varð heimsmeistari 2011 og 2012, í öðru sæti 2010 og 2014 og þriðja árin 2017 og 2021.

Anníe hefur lengi við mikil fyrirmynd og hún leggur áherslu á það að hún vilji fræða aðra um réttu fæðubótarefnin.

Vill kenna fólki

„Ég vil kenna fólki. Ég veit að það eru aðrar góðar og hreinar vörur þarna úti en það eru önnur fyrirtæki sem vilja bara selja eins mikið og mögulegt er. Þau framleiða vörur með það markmið að selja enn meira án þess að hugsa nógu mikið um neytandann. Ég vil fræða fólk um það af hverju þau eiga að taka inn þessi efni, hvenær þau eiga að gera það og hvernig þau græða á því,“ sagði Anníe Mist.

Hún vill að fólk átti sig á því og skilji í hverju gróðinn felist að neyta réttu fæðubótarefnanna á réttum tímum. Það má lesa alla greinina hér.

Keppni í kvennaflokki á heimsleikunum í ár hefst 3. ágúst og stendur til 6. ágúst næstkomandi.