Erlent

Rússar fá enn íhluti í vopn frá Vesturlöndum

Heimir Már Pétursson skrifar
Frá því samkomulag Sameinuðu þjóðanna með milligöngu Tyrkja var gert um útflutning á korni og ánburði frá Úkraínu var gert í fyrra haust hafa milljónir tonna af korni borist þaðan til ríkja víðs vegar um heim. Nú hafa Rússar gert stórfellda loftárás á Odessa, helstu útflutningshöfn Úkraínu.
Frá því samkomulag Sameinuðu þjóðanna með milligöngu Tyrkja var gert um útflutning á korni og ánburði frá Úkraínu var gert í fyrra haust hafa milljónir tonna af korni borist þaðan til ríkja víðs vegar um heim. Nú hafa Rússar gert stórfellda loftárás á Odessa, helstu útflutningshöfn Úkraínu. AP/Vadim Ghirda

Á innan við sólarhring frá því Rússar sögðu sig frá samkomulagi um útflutning á korni frá Úkraínu gerðu þeir öflugar loftárásir á Odessa, helstu útflutningshöfn landsins. Forseti Úkraínu segir Rússa enn fá íhluti til vopnasmíði frá Vesturlöndum og herða þurfi refsiaðgerðir gegn þeim.

Úkraínumenn segja Rússa hafa skotið 63 eldflaugum og sprengjudrónum að Odessa í nótt. Þeim hafi tekist að skjóta niður fjórtán eldflaugar og 23 dróna. Drónar og eldflaugar sem komust í gegn ollu töluverðu tjóni á hafnarsvæðinu í borginni, sem er stærsta útflutningshöfn Úkraínu. Sprengingarnar ollu einnig skemmdum á stóru fjölbýlishúsi í Odessa. Kona sem býr í húsinu lýsir árásinni svona:

„Ég var að horfa á sjónvarpið og gluggarnir þeyttust á rúmið við hliðina á mér. Sírenan fór allt í einu í gang og svo gerðist það. Rúðurnar lentu þarna og gluggapóstarnir þarna. Bíllinn var allur í klessu," sagði konan þar sem hún stóð í gluggakarmi.

Það er augljóst samhengi á milli þess að Rússar sögðu sig frá samkomulaginu og árásanna á Odessa. Matt Miller talsmaður bandaríska utanríkisráðuneytisins segir Rússa ljúga því að Vesturlönd hafi bannað útflutning þeirra á korni og annarri matvöru og þess vegna hafi þeir slitið samkomulaginu um útflutning Úkraínumanna.

„Það er ljóst að Rússar halda áfram að nota mat sem hernaðarvopn. Að þessu sinni bitna áhrifin ekki aðeins á Úkraínumönnum heldur einnig á heimsframboði á mat og verði. 65% þessara sendinga hafa farið til viðkvæmustu landa og þjóða heims. Heimsbyggðin á ekki að láta nýjustu lygar Moskvu blekkja sig.," segir Miller.

Úkraína hefur verið kölluð ein af brauðkörfum heimsins. Korn þaðan skiptir miklu máli fyrir fæðuöryggi margra fátækustu landa Afríku og Asíu.AP

Sameinuðu þjóðirnar, Bandaríkin, Evrópusambandið og Bretland hafi greitt götu útflutnings Rússa á matvælum. Þeir hafi hagnast mikið á þeim útflutningi síðast liðið ár en reyni að þrýsta á Vesturlönd að aflétta öðrum refsiaðgerðum sem bíti á þá.

Leo Varadkar forseti Írlands heimsótti Volodymyr Zelenski forseta Úkraínu í Kænugarði í dag og ítrekaði stuðningi Íra við Úkraínu.AP/Clodagh Kilcoyne

Volodymyr Zelensky forseti Úkraínu segir hins vegar að herða þurfi refsiaðgerðirnar. Rússar fái enn íhluti í eldflaugar frá Vesturlöndum og dróna frá Íran sem geri þeim kleift að fremja hryðjuverk í Úkraínu.

„Þeir nota íhluti frá löndum hins frjálsa heims. Allar slíkar staðreyndir styðja rök okkar fyrir því að núverandi refsiagðerðir og þrýstingur gegn Rússlandi dugar ekki. Ríki heimsins verða að takmarka viðskiptatengsl við hryðjuverkaríkið svo að enga íhluti frá hinum frjálsa heimi verði hægt að nota til hryðjuverka," segir forseti Úkraínu.

Innrás Rússa í Úkraínu Úkraína Rússland Bandaríkin Sameinuðu þjóðirnar Matvælaframleiðsla

Tengdar fréttir

Brotthvarf Rússa frá kornsamkomulaginu byggt á rússneskri lygi

Rússar gerðu mikla eldflauga- og drónaárás á hafnarborginna Odessa í Úkraínu í nótt. Fjöldi eldflauga og dróna náðu alla leið og ollu miklum skemmdum aðallega á hafnarsvæði borgarinnar. Úkraínumenn gerðu einnig eldflaugaárás á rússneska herstöð á suðurhluta Krímskaga.

Kuleba segir einu lausnina að vinna fullnaðarsigur á Rússum

Rússar gerðu öflugar eldflauga og dróna árásir á Odessa, helstu útflutningshöfn Úkraínu, í nótt nokkrum klukkustundum eftir að þeir sögðu sig frá samkomulagi um útflutning á korni og áburði frá Úkraínu um Svartahaf. Utanríkisráðherra Úkraínu segir einu langtímalausnina vera að vinna fullnaðarsigur á Rússum.

Tyrklandsforseti telur sig getað talið Putin hughvarf

Rússar tilkynntu í dag að þeir ætli ekki að framlengja samkomulag sem greiðir fyrir útflutningi á korni og áburði frá Úkraínu. Þá kenna þeir Úkraínumönnum um skemmdir á brú milli Rússlands og Krímskaga síðast liðna nótt.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið