Reyk­víkingur ársins er „full­kominn kennari“ sem hugsar út fyrir skóla­stofuna

Mikael Marinó Rivera, grunn­skóla­kennari í Rima­skóla í Grafar­vogi er Reyk­víkingur ársins 2023. Dagur B. Eggerts­son borgar­stjóri til­kynnti valið í morgun við opnun Elliða­ánna líkt og hefð er fyrir.

Óskað er eftir tilnefningum frá borgarbúum og segir Dagur að Mikael hafi fengið tilnefningar fyrir að vera frábær grunnskólakennari sem fari aðrar leiðir í að virkja nem­endur sem finna ekki sitt á­huga­svið í hefð­bundnum náms­greinum. Hann bætir við að valáfangar Mikaels hafi verið sérstaklega nefndir. 

„Einn þeirra fjallar um veiði, fluguveiði og að kenna krökkum að umgangast árnar og lífríkið, en líka að hnýta flugur og framvegis. Hann er líka þekktur fyrir valáfanga um Hringadróttinssögu og evrópuknattspyrnu og allskonar. Það greinilega geislaði gleði af þessum ábendingum þannig að hann er greinilega mjög vel af þessu kominn.“

Dagur segir að margar tilnefningar hafi borist líkt og undanfarin ár enda sé mikið um fólk að gera góða hluti.

„Við reynum að verðlauna sérstaklega fyrir óeigingirni. Stundum er það fólk sem er frægt í hverfinu sínu fyrir að halda öllu snyrtilegu og biðja ekki um neitt í staðinn. Reykvíkingur ársins er borgarbúi sem er nokkurskonar alþýðuhetja í augum samborgara sinna.“

Kennsla þurfi ekki að fara fram innan veggja skólans

Sjálfur segir Mikael að mikilvægast sé að hugsa út fyrir skólastofuna. Hann leggur mest upp úr því að vera sanngjarn, hress og að prófa eitthvað nýtt. 

„Þetta er bara fólk eins og við, það þarf ekkert að bregðast öðruvísi við þeim en öðri fólki. Það að vera jákvæður og duglegur að tileinka mér nýja hluti hefur fleytt mér langt í þessu í starfi.“

Mikael segir gríðarlega mikilvægt að hugsa út fyrir boxið í kennslu.

„Þetta er kennslan,“ segir hann og bendir á nemendur sína sem standa úti í á.

„Kennsla þarf ekki endilega að vera innan veggja skólans. Það er frábært hvað það er orðið mikið um að fólk sé farið að hugsa út fyrir skólastofuna. Það er allt hægt.“

Aðspurður um heilræði sem hann myndi gefa ungu fólki segir Mikael:

„Að vera þú sjálfur og hafa trú á því sem þú ert að gera. Trúin flytur fjöll og dáið er allt án drauma svo það er um að gera að elta drauminn sinn.“

Aflinn ekki aðalatriðið

Veiðin í morgun fór fyrir ofan garð og neðan en þrátt fyrir mikla eftirvæntingu varð bið á því að fyrsti lax ársins veiddist. Mikael náði einum sem slapp. Hann var þó ekki að mikla það fyrir sér.

„Það er bara hluti af þessu sporti, þessari dásamlegu íþrótt. Ef það væri á í hverju kasti og tuttugu laxar á dag væru allir löngu hættir held ég. En það er allur dagurinn eftir, vonandi skilar hann sér á endanum.“

Nemendur Mikaels í val­á­fanga í flugu­veiði voru með honum í morgun en þetta er í annað skipti sem Mikael bauð upp á þann áfanga. 

„Þetta snýst ekki bara að hnýta flugurnar og æfa köstin heldur var þetta mjög fjölbreytt. Það er komið inn á náttúruverndina, inn á líffræðina og það er mikil landafræði í þessu. Svo fórum við náttúrulega í veiði, fórum tvisvar hingað í Elliðaárnar, fórum í Korpu og Grímsá í Skugga. Þannig að þeir fengu vítt samhengi í þessu öllu saman.“

„Fullkominn kennari“

Það er augljóst að Mikael Marinó hefur greinilega mikla ástríðu fyrir starfinu.

„Já, þetta er besta starf í heimi og ég er ekki að fara hætta því. Ætli þetta hafi ekki verið fjórtándi veturinn minn og það eru mörg ár eftir.“

Og nemendurnir voru á einu máli um mannkosti Mikaels.

„Hann er fullkominn kennari. Besti kennari á landinu, langbesti,“ segja þeir Bjarki Freyr Haraldsson og Marel Máni Fannarsson.

„Við höfum lært svo mikið af honum og svo mikill stuðningur sem maður fær frá honum. Hann gerir allt fyrir okkur og til að láta okkur líða vel.“

Hann er geggjaður.