Hilmir Snær og Bene­dikt Erlings endur­gerðu frægan Fóst­bræðraskets

Um er að ræða aug­lýsingu fyrir öryggis­vesti á vegum Brokk, net­verslunar hesta­mannsins. Báðir eru þeir Hilmir Snær og Bene­dikt Erlings miklir hesta­menn og hafa verið um ára­bil svo at­hygli hefur oft vakið. 

Árið 2008 riðu þeir fé­lagar til að mynda saman frá hest­húsa­hverfinu Gusti í Kópa­vogi og niður í Hallar­garð við tjörnina í Reykja­vík í gjörningi þar sem þeir minntu borgar­full­trúa á að tryggja á­fram að­gang al­mennings og þá sér­stak­lega barna að hesta­réttinni og garðinum eftir sölu borgarinnar á Frír­kirkju­vegi.

Í aug­lýsingu Brokk slá þeir fé­lagar á öllu léttari strengi og endur­gera einn af þekktari sketsum Fóst­bræðra, sem sýndir voru á Stöð 2 á tíunda ára­tugnum. Sketsinn þekkja lang­flestir en hann var að finna í allra fyrstu seríunni af grínþáttunum sem sýnd var í sjónvarpi árið 1997. 

Þar gerir per­sóna Hilmis Snæs hosur sínar grænar fyrir per­sónu Benna Erlings á kómískan hátt við dræmar undir­tekir hins síðar­nefnda. Upprunalega sketsinn má horfa á hér og uppfærða útgáfu neðst í fréttinni.

Fóst­bræður hafa svo sannar­lega minnt á það hversu ræki­lega þeir hafa stimplað sig inn í þjóðar­vitundina en Jóhannes Haukur Jóhannes­son sagði til að mynda einn frægasta brandara þáttanna ný­verið í auka­hlut­verki sínu í hinum heims­frægu drama­þáttum Succession sem sýndir eru á Stöð 2.