Innlent

„Sér­­stakt“ að sitja inni í réttar­­sal með Bry­an Kohberger

Elísabet Inga Sigurðardóttir skrifar
Bryan Kohberger er grunaður um morðin á fjórum nemendum í Idaho í Bandaríkjunum.
Bryan Kohberger er grunaður um morðin á fjórum nemendum í Idaho í Bandaríkjunum. Instagram/Zach Wilkinson/AP

Íslensk kona, sem kafað hefur ofan í opinber gögn um stórt morðmál sem átti sér stað í bandarískum háskólabæ í vetur, fékk í vikunni að fara inn í réttarsal þegar hinn grunaði var leiddur fyrir dómara. Hún segir súrrealískt að hafa séð hann og aðstæður með eigin augum eftir að hafa skoðað málið í svo langan tíma.

Háskólabærinn Moscow í Idaho í Bandaríkjunum rataði í heimsfréttirnar eftir að fjórir nemar voru stungnir til bana á hrottalegan hátt í nóvember. Síðan þá hafa morðin verið til umfjöllunar um allan heim enda bærinn þekktur fyrir að vera öruggur og málið sagt eitt umfangsmesta morðmál Bandaríkjanna í seinni tíð.

Inga Kristjánsdóttir er líklega sá Íslendingur sem hefur fjallað hefur hvað mest um málið, en það gerir hún í sakamálahlaðvarpi sínu Illverk sem hún stofnaði árið 2019. 

Þegar hún varð þrítug fyrr á árinu gaf fjölskyldan henni ferð til Bandaríkjanna og hún staðráðin í að skoða slóðir Idaho málsins svokallaða enda málið heltekið hana og hún kynnt sér öll þau opinberu gögn sem liggja fyrir í málinu, vakið fram á nótt til að hlusta á blaðamannafundi og svo lengi mætti telja.

Í vikunni fór hún að húsinu á Tayler Avenue þar sem atburðurinn hrottalegi átti sér stað og lagði blóm á lóðina til að votta fórnarlömbum virðingu sína. Hún segir það hafa verið súrrealískt að skoða slóðir málsins efti að hafa skoðað gögn þess í svo langan tíma.

„Þetta var samt þung tilfinning því þú veist hvað kom fyrir þarna inni, þetta er eiginlega frekar ólýsanlegt og óraunverulegt og ótrúlega skrítið að fara lengst út í heim og kannast svona við þig,“ segir Inga.

Lögregla hefur stengt borða umhverfis vettvang glæpsins.instagram/illverk

Áætlað var að hinn grunaði í málinu, Bryan Kohberger yrði leiddur fyrir dómara í enda maímánaðar en Inga segir að dagsetningin hafi verið á reiki og því óljóst hvort hún yrði yfir höfuð á svæðinu þegar af því yrði.

„Svo vakna ég morguninn 22. maí og sá að þau áttu að hefjast þann dag. Þannig ég hugsaði: Ég fer þangað, ég er einni mínútu frá þessu.“

Hún og unnusti hennar Kjartan fóru því að dómshúsinu þar sem fréttafólk freistaði þess að komast inn.

„Það var komin heljarinar röð og við ákváðum að athuga hvort við kæmumst inn, skráðum okkur á lista og biðum í röðinni. Við komumst inn sem var mjög óraunverulegt. Það var athugað hvort við værum með byssur á okkur, þreifað á manni.“

Inga og unnusti hennar Kjartan biðu í tæpa þrjá tíma í röð fyrir utan dómshúsið.instagram/illverk

Eftir tæplega þriggja klukkutíma bið í röð segir Inga það hafa verið óraunverulegt að setjast inn í réttarsal. Þar hafi setið aðstandendur fórnarlamba og Bryan Kohberger.

„Ég var búin að lesa svo fáránlega mikið um Bryan Kohberger, allt frá því að vita nákvæmlega hver augnliturinn hans er og hvað hann er hár. En það sem kom mér svolítið á óvart var að hann er miklu hærri en ég hélt og svo upplifið ég hann... ég veit það ekki, ég hef alltaf upplifað hann svo illan með kalt og illt augnaráð en þegar maður sá hann svona nálægt og heyrði röddina hans „live“ þá upplifði ég hann sorgmæddan. Það var ótrúlega sérstakt, hvernig hann ber sig og hreyfir sig. Hann er ekkert eðlilega sérstakur náungi.“

Hún segir Kohberger ekki hafa tekið afstöðu í málinu, kosið að tjá sig ekki og lýsa hvorki yfir sekt né sakleysi. Áætlað er að réttarhöldin sjálf hefjist þann annan október.


Tengdar fréttir

Grunaður um dularfullt morð á fjórum háskólanemum

Lögregla í Pennsylvaníu í Bandaríkjunum handtók í gær karlmann á þrítugsaldri, sem grunaður er um dularfullt morð á fjórum háskólanemum í Idaho í nóvember. Málið vakti óhug, og jafnframt mikinn áhuga, á samfélagsmiðlum. 

Ung­mennin í I­da­ho voru stungin til bana

Komið er í ljós að fjögur ungmenni sem fundust látin á heimili sínu fyrir um viku síðan í Idaho voru stungin til bana. Þau voru nemendur í Idaho háskóla í Bandaríkjunum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×