Borgarstjóri: Reykjavík með vaxtaverki en stendur vel

Reykjavíkurborg hætti við skuldabréfaútgáfu sem átti að hefjast í dag í annað skiptið á stuttum tíma. Dagur B. Eggertsson borgarstjóri segir Reykjavík vera á áætlun varðandi lánsfjármögnun og búna að sækja 7 af 21 milljarði sem taka eigi að láni á þessu ári. Miðað við aðstæður á markaði hafi fjármálasvið borgarinnar ekki ástæðu til að fara í skuldabréfaútboð að sinni.

„Rykið er einfaldlega ekki sest eftir síðustu stýrivaxtahækkanir, eftir fjármálaáætlun ríkisstjórnarinnar. Við höfum trú á að það verði betra jafnvægi á markaðnum þegar líður á árið. Við þurfum ekki á þessum peningum að halda núna vegna þess að við vorum búin að gera aðrar ráðstafanir til að sækja fé eftir öðrum leiðum,“ segir Dagur.

Borgin reyni að haga sér skynsamlega og sækja fé þar sem kjörin væru best hverju sinni. Borgin væri hins vegar í mjög miklum fjárfestingum vegna þess að borgin væri að stækka.

„Við erum að fara í nokkur nýbyggingarhverfi. Við erum í viðhaldsátaki í skólum. Við erum að fjölga leikskólaplássum mjög verulega. Erum einfaldlega að þjóna vaxandi borg. Það útheimtir fjárfestingar og fyrir því erum við að taka lán,“ segir borgarstjóri.

Sveitarfélögin hafi tekið á sig miklar skuldbindingar í covid faraldrinum meðal annars fyrir hvatningu ríkisstjórnarinnar til að halda uppi atvinnustigi. Fjárhagur Reykjavíkurborgar væri engu að síður langt innan hættumarka.

Sjálfstæðismenn í borginni segja meirihlutann hins vegar safna skuldum.

„Reykjavík er auðvitað með lægri skuldir miðaðvið tekjur en nágrannasveitarfélögin og önnur stærstu sveitarfélög landsins. Við höfum fengið að heyra þennan söng hjá Sjálfstæðisflokknum í meira en tuttugu ár. Þó stendur Reykjavík sterkar og betur en flestir en við erum reyndar að vaxa meira. Því fylgja ákveðnir vaxtaverkir og við neitum því ekki að verðbólgan og staðan á markaði þess vegna ekki eins og við viljum hafa hana. Efnahagsástandið þarf gjarnan að batna til að við getum haldið okkar kúrs en það gerum við auðvitað,“segir Dagur B. Eggertsson.