Trump segir að hann verði handtekinn

Í svokölluðum „sannleik“ sem hann birti á samfélagsmiðli sínum, Truth Social, segir Trump að „ólöglegur leki“ bendi til þess að hann verði handtekinn á þriðjudaginn“ og kallar hann eftir því að stuðningsmenn hans mótmæli víðsvegar um Bandaríkin.

„Mótmælið. Takið þjóð okkar til baka!“ skrifar Trump.

Hér að neðan má sjá skjáskot af færslu Trumps. Ekki liggur fyrir til hvers hann er að vísa. Hvort lögmenn hans hafi sagt honum eitthvað eða þetta séu jafnvel bara vangaveltur. Fregnir hafa borist af því á síðustu dögum að forsvarsmenn lögreglunnar í New York hafi verið að undirbúa sig fyrir mögulega handtöku Trumps.

Alvin Bragg, umdæmissaksóknari í Manhattan, hefur verið með málið til rannsóknar um nokkuð skeið og hefur það verið skoðað af ákærudómstól.

Ákærudómstóll er fyrirbæri vestanhafs (e. Grand jury) þar sem kviðdómendur eru fengnir til að fara yfir vitnisburð og gögn í ákveðnum málum og kanna hvort þeim þyki tilefni til að leggja fram ákærur vegna meintra brota. Dómstóllinn hefur verið að skoða hvort Trump hafi brotið kosningalög með greiðslu til fyrrverandi klámleikkonunnar Stephanie Clifford. y Daniels, 

Bragg hefur ekki viljað tjá sig við fjölmiðla í dag. Saksóknarar á hans vegum hafa gefið til kynna að von sé á því að meðlimir ákærudómstólsins greiði atkvæði um hvort ákæra eigi Trump eða ekki.

Í frétt New York Times segir að minnst eitt vitni eigi eftir að bera vitni og það gæti tafið atkvæðagreiðsluna lítillega.

Michael Cohen, þáverandi einkalögmaður Trumps, lét Clifford fá 130 þúsund dali skömmu fyrir kosningarnar og var greiðslan fyrir þögn hennar en hún segist hafa sængað hjá Trump á árum áður, skömmu eftir að Melania Trump eignaði Barron Trump árið 2006.

Bragg er að kanna hvort lög varðandi kosningar í Bandaríkjunum hafi verið brotnar en Cohen greiddi Clifford úr eigin vasa og Trump greiddi Cohen. Rannsóknin hefur meðal annars snúist um það hvort greiðsluna megi skilgreina sem framlög til framboðs Trump og fer það langt yfir hámarkið sem einstaklingar mega gefa til framboðs stjórnmálamanns, sem er 2.700 dalir.

Hvort Trump verði ákærður eða ekki hefur ekki verið gert opinbert.

Málið ku einnig snúa að því þegar American Media Incorporated, sem gefur út National Enquirer, keypti sögu Karen McDougal, Playboy fyrirsætu, um meint framhjáhald hennar og Trumps fyrir 150 þúsund dali. Útgefandi National Enquirer er David J. Pecker, vinur Trump til langs tíma.

 Blaðið keypti réttinn á sögu McDougal og birti hana aldrei. Forsvarmenn blaðið gerðu samkomulag við saksóknara og viðurkenndu að hafa keypt söguna til að hjálpa framboði Trump.

Cohen hefur sagt að hann hafi endurgreitt fyrirtækinu og að hann hafi fengið greitt frá Trump fyrir báðar greiðslurnar.