Nálgast markmiðið óðfluga

Bergur Vilhjálmsson, Sigurjón Ernir Sturluson og Halldór Ragnar Guðjónsson hófust handa klukkan sjö í gærkvöldi. Um er að ræða svokallað Concept Iron Man því hann fer fram innanhúss á líkamsræktarvélum, til dæmis hlaupabretti og skíðavél. 

Í samtali við fréttastofu segir Sigurjón þá félagana fera í fantaformi en þeir æfa fjölbreyttar æfingar á hverjum einasta degi. 

„Við erum í góðu alhliða formi. Ég er aðeins öðruvísi en þeir, ég er einn Ultra-vitleysinga á Íslandi. Þannig ég hef gert margar áskoranir sem telja margar marga klukkutíma. Ég hef alveg farið 150-160 kílómetra í samfelldu hlaupi. Ég þekki vel hvað er að fara djúpt inn í þennan helli,“ segir Sigurjón. 

Á meðan þeir eru að næsta sólarhringinn verður hægt að styrkja þá en allt rennur óskipt til Krafts, stuðningsfélags fyrir ungt fólk sem greinst hefur með krabbamein og aðstandendur þeirra. Pabbi Sigurjóns lést úr krabbameini en honum þykir það vera mikil aukning í krabbameini hjá ungu fólki. 

„Stelpur frá 25 upp í 40, 50 sem mér finnst hálf óhugnanlegt. Þetta hefur alltaf verið meira hjá eldra fólki en það er svo sem alveg sama hvort það sé sykursýkin eða hvað það er, þetta er alltaf að færast neðar og neðar,“ segir Sigurjón. 

Þá veðrur einnig uppboð á reiðhjóli sem mun standa yfir alveg fram til klukkan 13 á mánudaginn. Hæsta boð rennur óskipt til Krafts.

Hann segist ekki vera hræddur við að sofna en það sem hann óttast mest er að gripið á höndunum fari til fjandans, já og rassinn. 

„Óþægilegast við þetta verður gripið og rassinn. Það getur verið mikið nudd og jafnvel að rassinn klemmist eitthvað og svoleiðis. Rasskinnarnar fara í hvora aðra og svona. Það verður ábyggilega það erfiðasta við þetta, óþægindin sem fylgja þessum stöðum,“ segir Sigurjón. 

Svefninn fyrir áskorunina og mataræðið fyrir og á meðan hún er í gangi eru mikilvæg atriði. Þeir munu einungis borða hreint mataræði allan tímann, til dæmis kjöt, egg, fisk, ávexti og grænmeti. 

Endurheimtin verður erfið en það er oft ekki fyrr en viku eftir svona áskorun sem líkaminn finnur virkilega fyrir henni. 

„Nú er ég að þróa verkefni sem ég hef aldrei gert, varðandi hvað þetta er þægilegt þannig lagað séð, hraðinn á þessu. Þetta mun aldrei reyna á öndun og við verðum aldrei að púla það mikið að við stöndum á öndinni. Þetta verður alltaf þægilegu hraði. það verður nýtt fyrir mér að sjá hvernig endurheimt er eftir svona lagað,“ segir Sigurjón. 

Í spilaranum hér fyrir neðan verður hægt að fylgjast með áskoruninni. Einnig er hægt að fylgjast með á Instagram-síðunni hans Sigurjóns.