Hlaut heilahristing og fór úr kjálkalið en er allur að koma til

Jóhannes lenti í árekstri við liðsfélaga sinn í FH og var í framhaldinu fluttur á sjúkrahús, enda leit þetta ekki vel út.

„Ég sem sagt fæ svakalegt högg. Ég og Jón Bjarni [Ólafsson] rekumst þarna saman og ég bara í rauninni dett þarna út skömmu eftir. Ég man í rauninni lítið eftir mér í korter eftir slysið. Ég fer úr kjálkalið og hlýt heilahristing í kjölfarið,“ sagði Jóhannes í samtali við Stöð 2 í gær.

Jóhannes segir að næstu klukkustundir hafi verið virkilega erfiðar og að nóttin eftir slysið hafi að miklu leyti farið í að glíma við eftirköst heilahristingsins.

„Nóttin og kvöldið eftir leikinn gegn Fram var bara vonlaus. Ég var bara ælandi og allt þetta basic sem gerist þegar maður fær heilahristing skilst mér. En síðan er kjálkinn eiginlega búinn að vera meira vesen síðustu daga. Ég borðaði fyrstu máltíðina í gær sem var ekki fljótandi.“

„En þetta er bara búið að ganga fínt og ég finn mun dag frá degi. Þannig að ég er á batavegi allavega.“

Þá segist Jóhannes ekki geta sagt til um hvenær hann muni snúa aftur á völlinn.

„Ég eiginlega get ekki sagt neitt. Maður verður náttúrulega bara að hlusta á lækna og þeir segja að þetta sé allavega vika og svo sjáum við til. En ég held að þetta aðeins lengra en vika. Gefum þessu allavega fram yfir leikinn gegn Gróttu og svo er náttúrulega Haukar-FH vikuna á eftir því.“

Þrátt fyrir þetta þunga högg segist Jóhannes ekki endilega óttast það að mæta á völlinn aftur.

„Ég held að þegar maður er kominn í leik þá gleymi maður þessu. En ég veit það ekki, þetta er rosa óvissa.“

Viðtalið við Jóhannes í heild sinni má sjá í spilaranum hér fyrir neðan.